Það er þrennt, sem öðru fremur, einkennir Barcelona. Fótboltinn, byggingarlistinn og maturinn. Ferðamenn borgarinnar óska þess flestir að magamálið væri meira svo hægt væri að smakka á öllu því lostæti sem er á boðstólum. Það er því furðulegt til þess að hugsa að alþjóðlegir skyndibitastaðir þrífist í þessari borg þar sem dýrindis tapas kostar minna en ómerkilegur fabrikku hamborgari.
Síðustu ár hafa meistarakokkar Barcelona og nágrennis verið uppteknir af því að útbúa flókna rétti að hætti El Bulli veitingastaðarins í Katalóníu. Þar liggur metnaðurinn í að breyta formi hráefnisins og búa til rétti sem enginn hefur áður séð og enginn möguleiki er að apa eftir í eldhúsinu heima. Þessi rembingur er þó ekki lengur í takt við tíðarandann. Það þarf því ekki að koma á óvart að matreiðslumennirnir eru farnir að beina sjónum sínum að heimilislegri mat sem er ódýrari en það sem kemur út úr tilraunaeldhúsinu.
Bistrónómía er hún kölluð þessi nýjasta viðbót við matarmenninguna í Barcelona. Verðlagið á þessum matsölustöðum er okkur Íslendingum fagnaðarefni. Sérstaklega í hádeginu. Þá er hægt að fá þriggja rétta máltíð, með víni, á tuttugu til fjörtíu evrur. Réttirnir eiga oftast sterkar rætur í matarkúltúr Katalóníu.
Þetta eru nafntoguðustu Bistrónómía veitingastaðirnir í fótboltaborginni:
Ápat, Carrer Aribau 137, apat.es
Hér er þekktasti rétturinn Morcilla pylsur og smokkfiskur. Hægt að gera vel við sig fyrir um 20 evrur í hádeginu.
Catalina, Angli 4 bis, catalina.es
Hádegismaturinn á undir 20 evrur á þessum litla hverfisveitingastað.
Coure, Passatge Marimon 20
Fyrir þá sem vilja prófa fylltan héra með foie gras. Coure er í dýrari kantinum og hádegismaturinn kostar um 30 til 50 evrur.
Embat, Carrer de Mallorca 34, restaurantembat.es
Vinsæll veitingastaður í fremur þröngum kjallara ofarlega í Eixample hverfinu. Í hádegi kosta aðalréttirnir um tíu evrur.
Fonda Gaig, Carrer de Córcega 200, fondagaig.com
Fallegt bistró þar sem Cannelloni með trufflu béchemel sósu slær víst flest annað út.
Gelonch, Carrer de Bailén 56, gelonch.es
Hlýr og litríkur staður en það gætir sérvisku í vali á réttum. Sandhverfa, entrecoute og rjómalagaðar kartöflur með hráskinku. Ostrur í passíon ávaxtasafa eru líka á boðstólum. Matseðill hússins 25 evrur.
Gresca, Carrer de Provenca 230, gresca.net
Hráefnið í hæsta klassa og verðið í lægri mörkunum. Hádegismáltíð kostar 25 evrur en kvöldmaturinn 60.
Hisop, Passatge Marimon 9, hisop.com
Nútímalega katalónsk matargerð en réttirnir eru sumir sagðir vera soldið „klikk“. Kolkrabbi með grilluðum lauk er dæmi um aðalrétt á Hisop.
Petit Comité, Passatge de la Concepció 13, petitcomite.cat
Íhaldsamur matseðill á glamúrlegum veitingastað.
Saüc, Passatge Lluis Pellicer 12, saucrestaurant.com
Kryddaður kiðlingur er meðal hápunktanna á seðlinum.
Toc, Carrer de Girona 59, tocbcn. com
Hrátt en smart innréttaðan iðnaðarhúsnæði. Kanína, laukbrauð, tómatar og campari. Hádegið á um 30 til 40 evrur.
TENGT EFNI: Matur og drykkur í Barcelona
NÝTT EFNI: Billegasta stjörnumáltíðin á Norðurlöndum
Mynd: Flickr, Wolfgang Staud
Heimild: Scanorama, New York Times
