Viðskiptahættir stjórnenda Booking.com eru til skoðunar hjá breska samkeppniseftirlitinu vegna gruns um verðsamráð.
Netsíðan Booking.com er meðal þeirra allra vinsælustu þegar kemur að hótelbókunum. Verðin sem þar eru í boði eru líka oftar en ekki þau lægstu á markaðinum. Og það er einmitt ástæðan fyrir rannsókn breska samkeppniseftirlitsins.
Samkeppnisaðili síðunnar segist nefnilega ítrekað hafa fengið kvartanir frá hóteleigendum í sumar þegar hann bauð gistingu á hótelunum þeirra á lægra verði en Booking.com. Hótelstjórarnir báru fyrir sig samkomulag þess efnis að Booking.com fengi ávallt að bjóða lægsta verðið. Þessir viðskiptahættir hafa hugsanlega komið í veg fyrir eðlilega verðmyndun á hótelmarkaðinum og því er málið nú til rannsóknar samkvæmt frétt The Times.
Ef forsvarsmenn fyrirtækisins verða fundnir sekir eiga þeir von á háum sektum og málshöfðun. Talsmaður þess segir í viðtali við The Times að engar reglur hafi verið brotnar og undirstrikar að hótelum er það í sjálfsvald sett hvort þau bjóði herbergi til sölu á síðunni eða ekki.
NÝJAR GREINAR: Þar sem kaffi cortado kallast Gíbraltar
TILBOÐ: Gistiheimili og hótelíbúðir í London frá 99 pundum
Mynd: Wikicommons