New York er einn þeirra tíu staða sem eiga á hættu að missa sérkenni sín.
Árlega tekur tímaritið Wanderlust saman lista yfir þá tíu ferðamannastaði sem taldir eru á góðri siglingu með að heyra sögunni til, alla vega í núverandi mynd.
Svona lítur listinn út:
1. Riga, Lettlandi.
Breskir ferðamenn í partígír leggja undir sig hina fallegu miðborg Riga um helgar. Ódýrt áfengi, strípiklúbbar og tækifæri til að láta vaða af kalasjnikov rifli heilla Tjallana en um leið eiga aðrir erfitt með að fóta sig í miðbænum.
2. Topparnir þrír í Bretlandi.
Að ná upp á topp hæstu fjalla Skotlands, Wales og Englands á einum sólarhring er vinsæl iðja í Bretlandi. Því miður fylgir þessum fólksfjölda rusl, hávaði og skemmdir á nátturunni.
3. Borough markaðurinn í London.
Það eru ekki bara járnbrautaframkvæmdir sem ógna þessum uppáhalds matarmarkaði Jamie Oliver heldur líka allir þessir ferðamenn sem markaðinn sækja. Þeir eru nefnilega flestir komnir til að skoða og taka myndir en ekki til að kaupa inn. Viðskiptin blómstra því ekki sem áður.
4. Wadi Rum í Jórdan.
Komst í sumar inn á heimsmynjalista Unesco og ekki var það til að draga úr vinsældunum. En því miður gerir eyðimörkin heimamönnum erfitt fyrir að koma upp almennilegri aðstöðu fyrir ferðafólkið.
5. Virunga þjóðgarðurinn í Lýðveldinu Kongó.
Hermenn, pólitíkusar og olíufurstar ógna tilveru þessa elsta þjóðgarðar í Afríku sem jafnframt er heimkynni stórs hluta af þeim fjallagórillum sem eftir eru.
6. New York.
Fleiri ferðamenn láta taka myndir sér fyrir framan Apple búðina á fimmtu breiðgötu en við Frelsisstyttuna og nú er verið að skipta út gömlu, gulu leigubílunum fyrir praktíska Nissan bíla. Þetta tvennt kemur heimsborginni á þennan vafasama lista Wanderlust.
7. Coruh áin í Tyrklandi.
Straumþung áin rennur niður eftir djúpum og þröngum gilum og þangað fjölmenna áhugamenn um rafting. En stjórnvöld vilja beisla vatnsorkuna á svæðinu og hafa nú þegar reist tvær stíflur og aðrar ellefu eru á teikniborðinu.
8. Gömlu hverfin í Peking.
Í elstu borgarhlutum Peking standa aldargömul hús við þröngar götur og stíga. Þessar fornu byggðir eru enn og aftur í hættu enda vilja ráðamenn í Kína ólmir reisa á lóðunum skýjakljúfa.
9. Lamu, Kenýa.
Á þessari eyju, rétt við strönd Kenýa, er margt frumstætt og asnar sjá að mestu um fólks- og vöruflutninga. Þrátt fyrir það nýtur Lamu vinsælda meðal kóngafólksins og þeirra frægu. En eyjan mun missa töluvert af sjarma sínum ef eitthvað verður af byggingu risastórrar olíuskipahafnar við eyjuna.
10. Madagaskar.
Hin óviðjafnanlega gróðursæld á Madagaskar er í hættu vegna óróa, spillingar og ofnýtingar.
TENGDAR GREINAR: 10 vinsælustu ferðamannalöndin
TILBOÐ: Kaupmannahöfn: Hotel Sct Thomas – 10% afsláttur fyrir lesendur Túrista
Mynd: Shark Attacks/Creative Commons