Framboð á flugi frá landinu eykst lítillega í sumar frá því síðasta þrátt fyrir tilkomu fjögurra nýrra félaga. Nýju áfangastaðirnir verða tveir.
Tvær af hverjum þremur brottförum frá Keflavíkurflugvelli í sumar verða á vegum Icelandair. Félagið er langstærsta flugfélagið hér á landi. Iceland Express er annað umsvifamesta fyrirtækið í millilandsflugi því rúmlega tíunda hver vél sem tekur á loft frá Keflavík í júlí er merkt félaginu. Vægi þess hefur þó minnkað töluvert frá síðasta sumri þegar það stóð fyrir nærri því fjórðu hverji ferð.
Þessi samdráttur hjá fyrirtækinu er helsta ástæða þess að flugum fjölgar aðeins um tæplega fimm prósent í júlí, í samanburði við sama tíma í fyrra, þrátt fyrir tilkomu fjögurra nýrra flugfélaga og aukinna umsvifa hjá Icelandair.
Vægi nýju félaganna Easy Jet, Norwegian og Primera Air er lítið en Wow Air verður þriðji stærsti aðilinn í millilandaflugi eins og sjá má á töflunni hér að neðan sem byggð er á upplýsingum af heimasíðu Keflavíkurflugvallar og fyrirtækjanna sjálfra.
Samanburður á fjölda brottfara á viku frá Keflavíkurflugvelli í júlí 2011 og 2012:
Flugfélag | Brottfarir á viku 2011 | Vægi | Brottfarir á viku 2012 | Vægi |
Icelandair | 183 | 64% | 203 | 67,5% |
Iceland Express | 69 | 24% | 32 | 11% |
Wow Air | – | – | 23 | 8% |
Air Berlin | 10 | 4% | 10 | 4% |
SAS | 6 | 2% | 6 | 2% |
Delta | 5 | 1,5% | 5 | 1,5% |
Lufthansa | 4 | 1,5% | 4 | 1% |
German Wings | 3 | 1% | 3 | 1% |
Easy Jet | – | – | 3 | 1% |
Norwegian | – | – | 3 | 1% |
Air Greenland | 2 | 0,5% | 2 | 0,5% |
Niki | 2 | 0,5% | 2 | 0,5% |
Transavia | 2 | 0,5% | 2 | 0,5% |
Primera Air | 2 | 0,5% | 2 | 0,5% |
Samtals ferðir | 286 | 300 |
Denver og Lyon eru nýju nöfnin
Í ár bætast tveir áfangastaðir við listann yfir þá staði sem flogið er beint til frá Keflavík. Fyrst er það Denver í Bandaríkjunum en Icelandair flýgur þangað fjórum sinnum í viku frá og með vorinu. Lyon í Frakklandi verður líka í fyrsta skipti valmöguleiki fyrir íslenska flugfarþega þegar Wow Air hefur starfssemi í sumarbyrjun. Að auki bjóða ferðaskrifstofurnar upp á ferðir til staða sem ekki eru hluti af sumardagskrá flugfélaganna.
NÝJAR GREINAR: Vinsælustu ferðamannastaðirnir – Vökvabannið vonandi að renna sitt skeið á enda
Mynd: Túristi