Hótelstjórar, veitingamenn og leikhúsfólk í heimsborginni leggjast öll á árarnar í von um að fá fleiri ferðamenn til borgarinnar í byrjun árs.
Þó New York sé vinsælasti ferðamannastaðurinn í Bandaríkjunum þá eru fyrstu tveir mánuðir ársins fremur rólegir hjá þeim sem starfa í ferðaþjónustunni í borginni. Enda er veðrið þar, líkt og hér, óútreiknanlegt á þessum árstíma og kuldaboli getur látið finna rækilega fyrir sér.
Til að ráða bót á þessum skorti á túristum í upphafi árs bjóða hótel borgarinnar fríar gistinætur, ókeypis morgunmat og lægri verð á dýrustu herbergjunum. Í leikhúsunum fá áhorfendur tvo miða á verði eins og á góðum matsölustöðum er hægt að fá þriggja rétta máltíð á þrjú þúsund krónur.
Þriðja nóttin í kaupbæti
Þeir sem eru til í að spenna bogann og bóka sér fimm stjörnu gistingu í New York á næstu vikum geta gert góð kaup. Þriðja nóttin er nefnilega frí á nokkrum af betri hótelunum, til dæmis kosta þrjár nætur á London NYC hótelinu um 75 þúsund krónur og svipaða prísa má finna á fleiri fimm stjörnu hótelum. Á ódýrari gististöðum eru alls kyns tilboð í gangi út febrúar, t.d. 15 prósent afsláttur fyrir þá sem bóka nokkrar nætur og frír morgunmatur.
Ódýrara að dekra við bragðlaukana
Þær eru fáar, ef einhverjar, borgirnar sem státa af öðru eins úrvali af góðum veitingastöðum eins og New York gerir. Það eru því jákvæð tíðindi fyrir matgæðinga að margir af betri matsölustöðum Manhattan ætla að lækka hjá sér verðið frá miðjum janúar og fram til tíunda febrúar. Hádegismaturinn kostar þá 24 dollara (3000 krónur) og kvöldmaturinn 35 dollara (4360 kr.). Um er að ræða þriggja rétta máltíðir og líkt og alltaf í Bandaríkjunum er skattinum bætt við eftir á.
Tilboð á dýrasta söngleik allra tíma
Einn af þeim fjölmörgu söngleikjum sem eru á fjölunum við Broadway er sá um Kóngulóarmanninn. Hann er sá dýrasti sem settur hefur verið upp á þessum slóðum og tónlistin er eftir þá Bono og The Edge úr U2. Þeir sem eru snöggir til geta fengið tvo miða á verði eins fram til mánaðarmóta. Fleiri leikhús bjóða sambærileg kjör.
Á heimasíðu ferðamálaráðs borgarinnar er að finna nánari upplýsingar um hvernig bóka má þessi tilboðsverð á gistingu, mat og skemmtun (smellið hér).
Icelandair er eina félagið sem flýgur héðan til New York yfir vetrarmánuðina. Þar má finna flug báðar leiðir á tæplega sextíu þúsund í janúar og febrúar og ódýrasta helgin, fimmtudagur til sunnudags, er á um sjötíu þúsund samkvæmt óformlegri athugun Túrista á fargjöldum.
TENGDAR GREINAR: Bestu borgaranir í New York
NÝJAR GREINAR: Við fáum meira frí í ár
Mynd: Joe Buglewicz © NYC & Company
