Ófærð á Reykjanesbraut seinkaði millilandaflugi undir lok síðasta mánaðar. Þrátt fyrir það var héldu áætlanir á Keflavíkurflugvelli í flestum tilvikum seinni tvær vikurnar í janúar.

Þrjár af hverjum fjórum flugferðum Icelandair til og frá landinu voru á réttum tíma á seinni hluta nýliðins mánaðar. Hjá Iceland Express var hlutfallið 57 prósent. Líkt og svo oft áður standast komutímarnir síður en brottfarartímarnir hjá fyrirtækjunum. Bæði bættu sig þó á þeim vettvangi og sér í lagi Iceland Express því síðustu tvo mánuði hafa vélar fyrirtækisins sjaldan lent við Leifsstöð á réttum tíma. Núna er hlutfallið 53 prósent eins og sjá má á töflunni hér að neðan. Flugtök Icelandair í Keflavík héldu áætlun í 85 prósent tilvika.

Tafir í mínútum talið voru lengri nú en undanfarin tímabil og munar þar mestu um að öllu morgunflugi frá Keflavíkurflugvelli var seinkað fram yfir hádegi þann 26. janúar. Biðin var því 14 mínútur í heildina hjá Iceland Express en nítján hjá Icelandair.

Iceland Express flýgur nú aðeins til London og Kaupmannahafnar og voru ferðirnar til og frá landinu tæplega fjörtíu á síðari hluta janúar. Það var einn tíundi af fjölda ferða á vegum Icelandair á tímabilinu.

Stundvísitölur Túrista, 16. til 31. janúar (í sviga eru niðurstöður fyrri hluta janúar).

Um útreikningana: Daglega reiknar Túristi út hversu mikill munur er á áætluðum komu- og brottfaratímum og þeim tímasetningum sem gefnar eru upp fyrir lendingar og flugtak á heimasíðu Keflavíkurflugvallar. Þar sem seinkun um korter telst vera innan skekkjumarka í fluggeiranum þá eru fimmtán mínútur dregnar frá öllum seinkunum. Flug sem tefjast um minna en stundarfjórðung teljast vera á áætlun.

NÝJAR GREINAR: Toppurinn á Danmörku
TENGDAR GREINAR: Stundvísitölur – fyrri hluti janúar

Mynd: Túristi