Besti veitingastaður í heimi er í Kaupmannahöfn en á Jótlandi er sá sem þykir skara fram úr á Norðurlöndum. Enn eitt dæmi um að gerð vinsældalista er ekki vísindaleg en breytir engu fyrir áhugafólk um góðan mat.
Það er margra mánaða bið eftir borði á besta veitingastað í heimi, Noma í Kaupmannahöfn. Konungsfjölskyldan er ekki einu sinni tekinn framfyrir röð sem er óvenjulegt í landi frænda okkar þar sem Margrét Þórhildur og hennar fólk getur alla jafna gengið að bestu bitunum.
En kannski er Noma ekki endilega sá besti í heimi því á Jótlandi er að finna Henne Kirkeby Kro, huggulega sveitakrá, sem nýlega var kjörinn besti veitingastaður Norðurlanda. Kokkar kráarinnar þykja standa sig betur en kollegar þeirra á Noma og hinum Michelin stöðunum í Kaupmannahöfn. Að minnsta kosti að mati samtaka norræna sælkera sem veittu verðlaunin.
Fiskur og grænmeti
Það ríkir ekki hefðbundin kráarstemmning á Henne Kirkeby Kro. Þetta er nefnilega alvöru veitingastaður þar sem helstu matreiðslumenn Danmerkur standa við eldavélar og útbúa rétti sem oftar en ekki eru settir saman úr hráefni úr nágrenninu. Sjávarfang frá strandbæjunum við vesturhafið er til dæmis áberandi á matseðlinum og grænmeti úr sveitinni.
Í hádeginu kosta aðalréttirnir frá tæpum tvö hundruð dönskum krónum (rúmar 4000 íslenskar) og þriggja rétta hádegismatur er á 345 danskar (rúmar 7000 íslenskar). Á kvöldin stendur valið á milli 550 króna matseðils eða 875 króna (tæpar 20.000 íslenskar).
Lagt sig eftir matinn
Eftir gestirnir hafa borðað nægju sína af dönsku góðgæti þá eiga þeir þess kost að halla sér á einu af fimm gestaherbergjum hússins. Þar er aðstaðan fyrsta flokks og kostar herbergið frá tæpum tvö þúsund dönskum (um 45.000 íslenskar).
þeir sem vilja gera sérstaklega vel við sig panta því bedda og borð þegar stefnan hefur verið sett á þetta fallega sveitbýli á vesturströnd Jótlands. Og það borgar sig að panta í tíma þó vissulega séu sætin á Henne Kirkeby Kro ekki eins umsetin og þau hjá Noma.
TENGDAR GREINAR: Villta norðvestrið
KÍKTU Í FRÍVERSLUN TÚRISTA
Myndir: Henne Kirkeby Kro
Þessi grein er skrifuð í samvinnu við:
