Taska sem er tíu kílóum of þung getur kostað flugfarþega rúmar tuttugu þúsund krónur aukalega. Verðskrár flugfélaganna vegna yfirvigtar eru mjög mismunandi.
Það getur reynst flugfarþegum dýrkeypt að pakka of miklu í töskurnar. Gjaldið fyrir hvert kíló, umfram leyfilega hámarksþyngd, kostar til dæmis rúmar tvö þúsund krónur hjá easyJet og er það miðað við hvern fluglegg. Kílóverðið er lægst hjá WOW air eða 1400 krónur.
Mörg félög rukka hins vegar fast gjald fyrir yfirvigt og skiptir þá engu hvort farið er einu kíló eða tíu yfir hámarksþyngdina. Hæst er gjaldið hjá Lufthansa, 8362 krónur, og lægst hjá Icelandair, 4900 krónur.
Leyfa mismikinn farangur
Hjá sumum lággjaldaflugfélögum borga farþegarnir fyrir allan innritaðan farangur. Annars staðar er ein taska innifalin en hún má ekki vega meira en 20 kíló. Farangursheimildin er rýmri hjá félögum eins og Icelandair, SAS og Airberlin sem takmarka þyngdina við 23 kíló. Þeir sem fljúga vestur um haf með Icelandair mega hins vegar taka með sér tvöfalt meira. Yfirvigtargjaldið er þó mun hærra hjá félaginu þegar um Ameríkuflug er að ræða eða 13.100 krónur.
Í töflunni hér að neðan má sjá hver farangursheimildin er hjá hverju flugfélagi fyrir sig og hvað borga þarf í yfirvigt. Miðað er við farþega á ódýrasta farrými.
Farangursheimild | Gjald vegna yfirvigtar (m.v. gengi evru 23.apr) | |
Airberlin | 23 kg | 8362kr. óháð aukakílóum |
Delta | 23 kg | 11706kr. óháð aukakílóum |
EasyJet | 20 kg | 2007kr. á kíló |
German Wings | 20 kg | 8362kr. fyrir 1-5 aukakíló, 15052kr. fyrir 5-10kg. |
Iceland Express | 20 kg | 7500kr. óháð aukakílóum |
Icelandair | 23 kg | 4900kr. innan Evrópu, 13100kr. í Ameríkuflugi |
Lufthansa | 23 kg | 8362kr. óháð aukakílóum |
Norwegian | 20 kg | 1505kr. á kíló + 1672kr. í þjónustugjald |
SAS | 23 kg | 5017kr. óháð aukakílóum |
Transavia | 20 kg | 1672kr. á kíló |
WOW air | 20 kg | 1400kr. á kíló |
NÝJAR GREINAR: easyJet næstdýrast í júlí
Mynd: geishaboy500/Creative Commons