„Ég hef aðallega haldið mig á Krít og eyjunum sem nefnast Kyklades. Krít er paradís, ekki bara vegna veðursældar og náttúrufars, heldur eru Krítverjar sérlega skemmtilegt og glettið fólk. Það er gott fyrir þá sem eru að byrja að kynnast Grikklandi að fara til Krítar. Þá mæli ég með borginni Hania sem er vestast á eyjunni, það er gamall, notalegur og sérlega fallegur bær. Frá Hania er auðvelt að komast á góðar strendur, upp í fjöll og út í náttúruna. Krítverjar eru mjög tengdir landi sínu og margir íbúar Hania eiga ólífutré eða aldingarða úti í sveit – oft í þorpunum þaðan sem þeir eru upprunnir.“
Skyldustopp á Santorini
„Kyklades eða Hringeyjarnar eru margar og fjölbreyttar. Þær eru fremur gróðursnauðar og vindafar tryggir að þær eru heldur svalar á sumrin. Bæir eru fullir af hvítkölkuðum húsum í gömlum stíl, hvítir og bláir litir eru allsráðandi. Mykonos er staður sem er fullur af fjöri, verslunum og næturlífi, en á Santorini standa bæirnir efst uppi á klettabrún og horfa yfir á stóran eldgíg. Santorini er eitt helsta náttúruundur í heimi og laðar til sín milljónir ferðamanna á ári. Þetta eru staðir sem maður verður að sjá, en ég ráðlegg engum að dvelja lengi á Santorini eða Mykonos, erillinn er of mikill og verðlagið of hátt.“
Góður matur og stórar baðstrendur
Uppáhaldseyjar Egils eru ólíkar Santorini og Mykonos. „Naxos er stór eyja, á henni er ágætur vatnsbúskapur og hún er því grónari en margar eyjarnar í kring – minnir nokkuð á Krít. Á eyjunni er mikill landbúnaður og fiskveiðar, þannig að ferðamennskan verður ekki yfirþyrmandi. Þarna er að finna stórar sandstrendur sem eru einhverjar þær bestu í Grikklandi, og aðalbærinn á eyjunni, sem er á stærð við Akureyri, er fullur af góðum veitingastöðum. Óvíða í Grikklandi borðar maður betur en á Naxos.“
„Amorgos er afskekkt eyja og hrjóstrug. Á henni er einstakt, nánast dulúðugt, andrúmsloft. Aðalbærinn á eyjunni er lengst innanlands, uppi á fjalli, og er oft sveipaður þoku, jafnvel á sumrin. Þarna er einstaklega fallegt klaustur sem er byggt utan í klettavegg og hefur verið í næstum þúsund ár. Folegandros er lítil eyja og ekki sérlega fjölsótt. Bærinn þar er einn sá fallegasti á Hringeyjunum, húsin eru hvítkölkuð og einstaklega vel varðveitt. Engir bílar geta ekið inn í bæinn – sem er mikill kostur. Þetta er frábær staður til að vera í næði – í burtu frá ys og þys veraldarinnar. Það er eins og tíminn líði öðruvísi á svona stað – þarna er enn að finna bændur sem nota asna við störf sín.“
Höfuðborgin vex í áliti
„Til Aþenu hef ég komið mörgum sinnum og smátt og smátt hef ég farið að kunna vel við mig þar. Þótt hún standi á gömlum merg er Aþena að miklu leyti nokkuð ung borg. Samgöngur í henni bötnuðu mikið eftir Ólympíuleikana 2004. Fyrir utan Akropolis, hið glæsilega nýja Akropolis-safn og aðrar fornminjar eru býsna skemmtileg hverfi í borginni – Plaka og Monastiraki sem eru næst Akropolis, Kolonaki sem er mikið verslunar og kaffihúsahverfi og Psirri sem er hverfi þar sem ungt fólk heldur mikið til – það er eins og að koma í fuglabjarg að fara þangað á kvöldin.“
Ekki nauðsynlegt að bóka gistingu fyrirfram
„Það er auðvelt að finna flug til Krítar frá Norðurlöndunum, Bretlandi eða Þýskalandi. Til eyjanna er auðveldast að komast með því að fljúga annað hvort til Aþenu og taka flug eða ferju þaðan, en einnig er hægt að finna flug frá sumum evrópskum borgum, til dæmis Berlín, beint til Santorini eða Mykonos. Það er tilvalið að skoða eins og þrjár eyjur í einni ferð – maður þarf ekki að hafa miklar áhyggjur af því að bóka hótel eða herbergi.“
HÓTEL: Gerðu verðsamanburð á gistingu í Aþenu, Santorini, Krít og Mykonos
TENGDAR GREINAR: Grikkir reyna íslensku aðferðina