Í gær spurði Túristi talsmann Isavia, Friðþór Eydal þessara spurninga:
a) Er það Isavia sem ákveður að allir farþegar þurfi úr skóm svo hægt sé að skanna skóbúnaðinn eða eru það yfirvöld í Bandaríkjunum?
b) Af hverju þarf að skoða skó farþega fólks á leið til Bandaríkjanna betur í Keflavík en þeirra sem fljúga frá stærsta flugvelli Evrópu (Heathrow) til Bandaríkjanna?
c) Hvað þykir forsvarsmönnum Isavia um þá stefnu Kaupmannahafnarflugvallar að láta ekki farþega fara úr skóm í vopnaleit og skima þar af leiðandi ekki skóna?
d) Flugmálastjórn hefur gefið það út að eftirlitið með skóm í Keflavík sé íþyngjandi fyrir farþega. Er Isavia á sömu skoðun? Sjá nánar hér.
Svar Friðþórs Eydal talsmanns Isavia:
Flugverndargæsla og vopnaleit til öryggis fyrir flugfarþega
Flugverndargæsla, þ.m.t. vopna- og sprengjuleit í farangri og á farþegum, miðast við að veita flugfarþegum tilhlýðilegt öryggi gegn ólögmætu athæfi, t.d. af hendi annarra flugfarþega.
Framkvæmdin snýst um að framfylgja þeim kröfum sem settar eru á flugrekendur og stjórnvöld varðandi öryggi flugfarþega en flugvallarekendur líkt og Isavia annast framkvæmdina fyrir þessa aðila.
Aðstaða er ekki fyrir hendi á Keflavíkurflugvelli til þess að hafa sérstaka skimunarstöð fyrir farþega til Ameríku og sérstöð fyrir Evrópu eins og víða er viðhaft annarsstaðar í Evrópu. Því er leitast við að sameina kröfurnar, þ.e. íslenskar reglugerðir um flugvelli og kröfur sem gerðar eru til flugfélaga sem fljúga til Bandaríkjanna, t.d. Icelandair og Delta. Isavia annast framkvæmd flugverndar fyrir fyrir þessa flugrekendur í samræmi við kröfur sem flugöryggisstofnun Bandaríkjanna setur þeim, t.d. um úrtaksskimun. Einu farþegarnir sem gætu þurft að fara úr skóm tvisvar við skimun eru farþegar á leið til Bandaríkjanna sem lenda í slíku handahófsúrtaki.
Kannanir á flæði farþega um skimunarstöðvar á Keflavíkurflugvelli sýna minni tafir minni óþægindi fyrir farþega þegar allir fara úr skóm til skimunar strax. Allflestir skór hafa að geyma málma, t.d. í sóla eða kósa fyrir reimar sem greinast í málmleitartækjum. Þegar það gerist verður að biðja farþegann að taka af sér skóna og senda hann aftur í gegnum málmleitarhliðið skólausan og skóna í gegnumlýsingu. Þessi framkvæmd tefur aðra farþega í röðinni og sífelld endurtekning eykur tafir og óþægindi þeirra enn frekar.
Einungis örfáir farþegar gera athugasemdir við það að fara úr skónum strax miðað við þegar valið er af handahófi. „ Af hverju ég en ekki hann“, var algeng spurning áður en þessi háttur var tekinn upp.
Framkvæmd flugverndarskimunar er í sífelldri endurskoðun. Fyrst of fremst verður að gæta þess að farið sé að settum reglum og að fyllsta öryggi farþega sé tryggt og jafnframt að þeir verði ekki fyrir töfum á áfangastað ef flugvernd þykir ekki fullnægjandi hérlendis. Auk þess er mjög mikilvægt að hafa þægindi farþega að leiðarljósi og að efla öryggistilfinningu þeirra.
Niðurstöður alþjóðlegra þjónustukannana sýna að farþegar á Keflavíkurflugvelli eru ánægðir með framkvæmd flugverndar, og frá því að reglan um að allir farþegar skuli taka af sér skóna hefur flugvöllurinn í tvígang verið útnefndur besti flugvöllur í Evrópu.“
