Í maí tilkynnti Iceland Express að félagið ætlaði að fljúga allt árið til Berlínar. Úr því verður hins vegar ekki.
Iceland Express ætlaði sér stóra hluti á Þýskalandsmarkaði í vetur. Í fréttatilkynningu frá fyrirtækinu í vor segir að flogið verði allt árið um kring til Berlínar og stefnt væri að því að fjölga umtalsvert komum þýskra ferðamanna hingað til lands á veturna. Þetta var markmiðið þó félagið hafi fellt niður flug til Berlínar síðasta vetur.
Svo virðist sem átak Iceland Express í Þýskalandi í sumar hafi ekki skilað árangri því aftur ætlar félagið að hætta við flug til Berlínar yfir vetrarmánuðina. Ferðirnar leggjast því af í lok október og hefjast að nýju í vor.
Heimir Már Pétursson, upplýsingafulltrúi Iceland Express, segir í samtali við Túrista að eftirspurnin hér heima og í Þýskalandi hafi ekki staðið undir væntingum. Markaðurinn er ekki til staðar að hans sögn.
WOW air situr eitt að Berlín
Túristi sagði frá því í morgun að WOW air hyggðist draga saman seglin næstu mánuði. Félagið ætlar sér samt sem áður að fljúga tvær ferðir á viku til Berlínar í allan vetur. Forsvarsmenn WOW air sjá því greinilega tækifæri í höfuðborg Þýskalands sem Iceland Express hefur ekki getað nýtt sér.
Fylgstu með Túrista á Facebook
TILBOÐ Á GISTINGU Í BERLÍN FYRIR LESENDUR TÚRISTA: 5% afsláttur á íbúðahóteli
NÝJAR GREINAR: Verðkönnun á flugvélamat