Þær eru fullskipaðar flugbrautirnar við stærsta flugvöll Evrópu, Heathrow í London. Flugfélög sem vilja bæta vellinum við leiðakerfi sitt þurfa því að kaupa lendingarleyfi af núverandi félögum og dæmi eru um að leyfi hafi verið seld á sem samsvarar fimm milljarða íslenskra króna.
Forsvarsmenn skandinavíska flugfélagsins SAS íhuga nú að veðsetja leyfi félagsins í London til að fá aukið fjármagn í reksturinn. SAS situr á 3 til 5 prósent af öllum lendingarleyfum Heathrow vallar samkvæmt frétt Business.dk og gæti verðmæti þeirra verið um 250 milljarðar íslenskra króna.
Icelandair á tvö lendingarleyfi á Heathrow og virði þeirra því um tíu milljarðar króna líkt og Túristi greindi frá í vetur. Það mun hins vegar ekki vera til umræðu að koma þeim í verð samkvæmt upplýsingafulltrúa fyrirtækisins.
