Samfélagsmiðlar

Verslað í Washington

Það kostar ekkert að skoða þekktustu kennileitin né söfnin í höfuðborg Bandaríkjamanna. Þar er því hægt að versla fyrir allan peninginn.

Það snúa sennilega fáir tómhentir heim úr ferð til Ameríku. Úrvalið í stórborgunum vestanhafs tekur nefnilega flestu öðru fram og verðlagið oft betra en við eigum að venjast hér heima.

Þeir sem leggja leið sín til Washington komast varla hjá því að kíkja í nokkrar búðir því þær verða víða á vegi fólks þegar gengið er á milli hinna þekktu bygginga og minnismerkja sem setja svo sterkan svip á borgina. Sú staðreynd að það kostar sjaldnast nokkuð að skoða þekktustu mannvirkin og söfnin gerir það að verkum að pyngjan léttist fyrst þegar haldið er í verslunarleiðangur eða til að fá sér í svanginn.

Hverfisverslanir Hvíta hússins

Ætli langflestir ferðamenn í Washington eigi ekki leið framhjá heimili Bandaríkjaforseta einu sinni eða oftar á meðan á dvöl þeirra stendur. Minnismerkin, söfnin og þinghúsið við National Mall garðinn eru líka skyldustopp en í nágrenni við þessa merku staði er að finna mikið úrval af fatabúðum. Verslanir Macy´s, Banana Republic, H&M, Forever 21, J Crew og Urban Outfitters eru allar á breiðgötum F og G á milli sjöunda og þrettánda strætis. Það er því auðvelt að ná sögunni og tískunni á einu stóru bretti, alla vega ef ferðalangurinn er vel skóaður.

Notalegt í Georgetown

Í háskólahverfinu Georgetown er stemmningin nokkuð afslappaðri en innan um háhýsin í miðborginni. Á tveimur aðalverslunargötum hverfisins (M st. NW og Wisconsin Avenue) hafa kaupmenn og veitingamenn komið sér fyrir í lágreistum, gömlum byggingum og úti rölta stúdentar, fjölskyldur og virðulegir eldri borgarar með ný föt í pokum merktum þekktustu tískuvöruframleiðendum Bandaríkjanna og Evrópu. Á svæðinu er líka Apple búð, risastór North Face verslun og í Dean&Deluca fá sælkerar útrás. Þar inni er kjörið að fá sér snarl og má óhikað mæla með samlokustandi verslunarinnar þar sem smurðar eru risalokur sem gefa góða fyllingu áður en haldið er áfram í leit að bestu kaupunum. Á miðri M Street er Georgetown Park verslunarmiðstöðin sem hefur upp á ýmislegt að bjóða þó hún teljist frekar lítil á amerískan mælikvarða.

Sjötta stærsta kringlan

Það sem ekki finnst inn í Washington er næsta öruggulega til í hillum tveggja risastórra verslunarmiðstöðva í útjaðri borgarinnar. Í Pentagon City, rétt við skrifstofur varnarmálaráðuneytisins, eru um tvö hundruð verslanir (sjá lista) og þangað er auðvelt að komast með neðanjarðarlest. Aðeins lengra í burtu er hin risavaxna kringla Tyson Corner Center sem mun vera sú sjötta stærsta í Bandaríkjunum. Þangað fara þeir sem eru í þessu af lífi og sál því það tekur tíma að þræða hátt í 300 verslanir. Það er auðveldast að taka leigubíl út í Tyson Corner og má búast við að farið kosti rúmlega 30 dollara (borgar sig að spyrja bílstjórann fyrst).

Í Bandaríkjunum er hægt að gera góð kaup alla daga vikunnar og verslanir oftast opnar fram til átta á kvöldin mánudaga til laugardaga en styttra á sunnudögum.

Icelandair flýgur til Wasington fjórum sinnum í viku allt árið um kring.

TENGDAR GREINAR: Fjör á fjórtánda stræti í WashingtonBæjarins bestu í Washington

Myndir: Túristi

Nýtt efni

Mitt inn í dimmum Grünheideskógi skammt frá Berlín hafa 80 manneskjur komið sér fyrir í kofum sem þau hafa byggt hátt uppi trjánum. Kofaþorpið eru bækistöðvar mótmælenda eða aðgerðarsinna eins og þau kalla sig. Einmitt inni í þessum sama skógi hyggst bandaríski rafmagnsbílaframleiðandinn Tesla stækka svokallaða gígaverksmiðju sem var tekin var í notkun í mars …

Lufthansa hefur náð samkomulagi við verkalýðsfélagið Verdi og þar með er endi bundinn á langa vinnudeilu við flugvallarstarfsfólk þýska flugfélagsins. Flugáætlun Lufthansa fer því ekki úr skorðum yfir páskana líkt og útlit var fyrir en félagið er með þrjár flugferðir til Íslands á áætlun sinni yfir hátíðarnar. Hinn nýi samningur Verdi og Lufthansa kemur í …

Það voru 561 þúsund skráðar gistinætur hér á landi í febrúar sem er um 2,5 prósent samdráttur í samanburði sama tímabil í fyrra. Ef tekið er tillit til hlaupársdagsins þá var fækkunin ennþá meiri eða nærri 6 af hundraði. Á hótelum landsins voru gistinæturnar 373 þúsund sem er ögn meira en í febrúar í fyrra …

Þegar Hagstofan leggur mat á breytingar á verðlagi þá er meðal annars horft til fargjalda, bæði í flug innanlands og til útlanda. Samkvæmt nýjum verðmælingum Hagstofunnar þá lækkaði farið frá Keflavíkurflugvelli um 5 prósent í mars en farþegar í innanlandsflugi þurftu að borga 16 prósent meira en í fyrra. Á sama tíma hækkaði verðlag í …

„Undanfarna mánuði hafa stjórnmálamenn og verkalýðsforingjar viðrað hugmyndir um að hækka virðisaukaskattshlutfall ferðaþjónustu í 24%. Almenn greining á grundvelli viðtekinnar þjóðhagfræði, sem SAF hefur látið vinna, bendir til þess að slík hækkun myndi almennt hækka verðlag og þar með verðbólgu á viðkomandi ári, lækka veltu í ferðaþjónustu, veikja samkeppnishæfni hennar, lækka verga landsframleiðslu og auka …

Xiaomi er hraðvaxta hátæknifyrirtæki í Beijing í Kína, stofnað fyrir 14 árum af frumkvöðlinum og milljarðamæringnum Lei Jun og félögum hans. Á síðasta ári var fyrirtækið í þriðja sæti á lista þeirra sem seldu flesta farsímana - næst á eftir Samsung og Apple. Xiaomi framleiðir og selur margskonar annan háþróaðan tæknibúnað og neytendavörur en samdráttur …

Fyrir rúmu ári var greint frá því að þýska Lufthansa-samsteypan hefði áhuga á að kaupa 40 prósenta hlut í ítalska þjóðarflugfélaginu ITA en niðurstaða hefur ekki enn fengist. Í janúar hóf Framkvæmdastjórn Evrópusambandsins rannsókn á samkeppnisáhrifum þess að Þjóðverjarnir eignuðust stóran hlut í ítalska flugfélaginu sem lengi hefur verið stjórnvöldum á Ítalíu höfuðverkur.  Nú í …

Fyrir mánuði sendi Storytel frá sér fréttatilkynningu þar sem kynnt var ný þjónusta fyrir notendur. Brátt eiga hlustendur hljóðbóka möguleika á að velja nýjan lesara ef þeim líkar ekki innlesturinn. Valraddirnar eru allar skapaðar af vélmennum eða svokölluðum gervigreindarupplesurum.  Þetta nýja verkfæri Stoyrtel er tekið í gagnið vegna þess að 89 prósent af þeim sem …