Flug til annarra landa tekur sjaldnast minna en þrjá tíma. Bil milli sæta getur því skipt miklu máli, sérstaklega fyrir þá sem eru yfir meðalhæð.
Það myndi skapast ófremdarástand á flugvélaganginum ef farþegarnir ætluðu reglulega að teygja úr sér. Flestir halda því kyrru fyrir í sætunum þrátt fyrir þrengslin. Aðstaðan er reyndar mismunandi eftir flugfélögum og jafnvel flugvélum. Þannig getur bilið milli sætisraða verið 71 til 81 cm hjá WOW air. Hjá Transavia, sem flýgur héðan til Parísar á sumarin, er bilið 71 cm í öllum tilvikum nema ef farþegarnir borga aukalega fyrir meira fótapláss.
Hjá Icelandair ganga farþegarnir að mesta plássinu vísu því það er ávallt 81 cm á ódýrasta farrýminu. Hjá Delta, SAS og WOW air getur það einnig verið svona mikið en það getur líka verið mun minna eins og í tilviki WOW air. Til samanburðar má nefna að bilið hjá Ryanair er 76 cm en það félag er betur þekkt fyrir lág verð en þægindi.
Nýir stólar og meira fótapláss
Sætisbil er lengdin milli stólbaka og er því vísbending um hversu mikið rými er fyrir fæturna. Gerð stólanna hefur líka sitt að segja og þannig mun fótaplássið í vélum Primera Air aukast um 5 til 6 sentimetra með nýjum sætum þó bilið á milli þeirra haldist óbreytt
Bilið milli sætisraða á ódýrasta farrými*:
Félag | Bil milli raða |
Airberlin/Niki | 73,5 til 76 cm |
Delta | 79 til 81 cm |
easyJet | 73,5 cm |
German Wings | 73,5 cm |
Icelandair | 81 cm |
Lufthansa | 76 til 79 cm |
Norwegian | 73,5 cm |
Primera Air | 73,5 til 79 cm |
SAS | 76 til 81 cm |
Transavia | 71 cm |
WOW air | 71 til 81 cm. |
*byggt upplýsingum frá félögunum
Fylgstu með Túrista á Facebook
NÝJAR GREINAR: 5 ferðir í næstu viku á minna en 40 þúsund
HÓTEL: Gerðu verðsamanburð á hótelum í útlöndum og bókaðu hagstæðasta kostinn
Mynd: SAS