Þó verðstríði Iceland Express og WOW air sé lokið þá er enn hægt að fá flug til útlanda fyrir minna en tíu þúsund.
Ísland er ekki í alfaraleið og því tekur sjaldnast minna en þrjá tíma að fljúga á meginland Evrópu. Það er því kannski eðlilegt að lægstu fargjöld hér á landi séu oft hærri en tombóluprísar lággjaldaflugfélaganna í Evrópu. Verðstríð Iceland Express og WOW air síðastliðið sumar lækkaði hins vegar verð á farmiðum töluvert en afleiðingin varð sú að eigendur fyrrnefnda félagsins gáfust upp. Það er því ekki víst að fargjöld næsta árs verði í takt við það sem bauðst nú í sumar. Eða hvað? Túristi hefur nefnilega fundið fjórar ferðir til útlanda í vor þar sem farið fram og tilbaka kostar undir tuttugu þúsund.
Edinborg: 19.319 kr.
Í lok mars hefur easyJet flug héðan til höfuðborgar Skotlands. Borgin var nýlega valinn fremsti ferðamannastaður Evrópu og hefur það orð á sér að vera í ódýrari kantinum. Dagana 25. til 29. apríl er hægt að fá far með breska lággjaldaflugfélaginu fyrir rúmar nítján þúsund krónur. Lesendur Túrista fá sérkjör á gistingu í Edinborg eins sjá má hér.
London: 18.904 kr.
Fulham og Tottenham eiga bæði heimaleik í London 4. maí en hægt er að fljúga til borgarinnar 2. til 7. þess mánaðar með easyJet fyrir tæpar nítján þúsund krónur. Til að finna ódýrustu gistinguna í borginni mælir Túristi með leitarvél HotelsCombined (smellið hér).
Osló: 18.565 til 19.800 kr.
Höfuðborg Noregs er alla jafna í einu af efstu sætunum yfir dýrustu ferðamannaborgir í heimi. Það er því kostur að komast þangað hræódýrt í vor. Norska lággjaldaflugfélagið Norwegian flýgur þangað þrisvar í viku og 11. til 14. apríl er hægt að komast með félaginu fyrir aðeins 18.565 krónur. Heimsferðir bjóða farið á tæplega tuttugu þúsund krónur dagana 14. til 18. mars. Til að gera verðsamanburð á gistingu í Osló smellið þá hér.
Verðin voru fundin á heimasíðu félaganna 4. desember og hafa ber í huga að Norwegian og easyJet rukka aukalega fyrir innritaðan farangur. Upplýsingar um aukagjöld flugfélaganna má finna í þessari samantekt Túrista.
NÝJAR GREINAR: Júlía á heimavelli í Berlín – Icelandair með 83 prósent af ferðunum
Mynd: VisitScotland/ScottishViewpoint
