Samfélagsmiðlar

Deilt um flugvélastæðin í Keflavík

Icelandair gæti þurft að víkja fyrir vélum Wow Air við Flugstöð Leifs Eiríkssonar næsta sumar ef áfrýjunarnefnd samkeppnismála tekur undir nýjan úrskurð Samkeppnisstofnunnar. Þangað til ríkir nokkur óvissa um flugáætlanir flugfélaganna yfir aðalferðamannatímann.

Í vor sendu forsvarsmenn Wow Air erindi til Samkeppnisstofnunnar þar sem kvartað var yfir því hvernig Isavia, rekstraraðili Keflavíkurflugvallar, úthlutar flugfélögum afgreiðslutíma við Flugstöð Leifs Eiríkssonar. Stendur styr um leyfi til að fljúga til Evrópu milli klukkan sjö og átta á morgnana og vestur um haf milli klukkan 16 og 17:30. Icelandair hefur um langt árabil nýtt þessa tíma til að tengja saman flug milli Evrópu og N-Ameríku.

Stjórnendur Wow Air ætla að einnig að taka upp þetta fyrirkomulag þegar félagið hefur flug til Bandaríkjanna í byrjun sumars og það er ástæðan fyrir því að félagið leitaði til samkeppnisyfirvalda. Í erindi þess segir: „…verði ekki orðið við kröfum Wow Air þá megi ljóst vera að fyrirhugaður samkeppnisrekstur í flugi á milli Íslands og Bandaríkjanna sé með öllu útilokaður.“ Þrátt fyrir þessa afdráttarlausu afstöðu þá tilkynntu forsvarsmenn Wow Air á miðvikudaginn í síðustu viku að félagið muni hefja flug til Boston í Bandaríkjunum næsta vor. Niðurstaða Samkeppnisstofnunnar lá svo fyrir tveimur dögum síðar og þar er farið fram á við Isavia að tryggja Wow Air tvo afgreiðslutíma við flugstöðina að morgni og seinnipartinn næsta sumar.

Óvissa með flugtíma

Nokkrum klukkutímum eftir að úrskurður Samkeppnisstofnunnar var birtur þá gáfu forsvarsmenn Isavia það út að þeir hyggist áfrýja honum. Í tilkynningu félagsins segir að úthlutunin sé framkvæmd af óháðum alþjóðlegum aðila og telur Isavia óheimilt að grípa inn í með þeim hætti sem Samkeppniseftirlitið krefst.

Í ákvörðunarorðum eftirlitsins segir hins vegar að fyrirkomulag þessa aðila við úthlutun afgreiðslutíma á Keflavíkurflugvelli hafi skaðleg áhrif á samkeppni. Isavia er því ætlað að tryggja Wow Air afgreiðslutíma til flugs til Bandaríkjanna seinnipart dags næsta sumar. Friðþór Eydal, talsmaður Isavia, staðfestir við Túrista að nú sé unnið að því að útbúa áfrýjunina.

Samkvæmt samkeppnislögum skal úrskurður áfrýjunarnefndar liggja fyrir innan sex vikna frá áfrýjun. Áfrýjun frestar hins vegar ekki gildistöku ákvarðana Samkeppniseftirlitsins samkvæmt því sem segir á heimasíðu eftirlitsins. Stjórnendur Wow Air gætu því líklega farið fram á að fá þá afgreiðslutíma sem Samkeppniseftirlitið hefur úrskurðað að þeir eigi rétt á. Fallist áfrýjunarnefndin hins vegar á kröfur Isavia þá yrðu tímunum hugsanlega ráðstafað á annan hátt. En afgreiðslutímum fyrir næsta sumar var úthlutað í síðustu viku en þeir verða fyrst gerðir opinberir um miðjan nóvember.

Hver sem niðurstaða áfrýjunarnefndarinnar verður er ljóst að flugáætlun Wow Air og Icelandair næsta sumar er í lausu lofti að nokkru leyti og líklega gerir það félögunum erfiðara um vik að selja sæti í flug þegar endanlegir ferðatímar liggja ekki fyrir.

NÝJAR GREINAR: Auðvelt að finna ódýrari bílaleigubíl
TILBOÐ: 15% afsláttur á góðu hóteli í Kaupmannahöfn

Mynd: Isavia

Nýtt efni

Mitt inn í dimmum Grünheideskógi skammt frá Berlín hafa 80 manneskjur komið sér fyrir í kofum sem þau hafa byggt hátt uppi trjánum. Kofaþorpið eru bækistöðvar mótmælenda eða aðgerðarsinna eins og þau kalla sig. Einmitt inni í þessum sama skógi hyggst bandaríski rafmagnsbílaframleiðandinn Tesla stækka svokallaða gígaverksmiðju sem var tekin var í notkun í mars …

Lufthansa hefur náð samkomulagi við verkalýðsfélagið Verdi og þar með er endi bundinn á langa vinnudeilu við flugvallarstarfsfólk þýska flugfélagsins. Flugáætlun Lufthansa fer því ekki úr skorðum yfir páskana líkt og útlit var fyrir en félagið er með þrjár flugferðir til Íslands á áætlun sinni yfir hátíðarnar. Hinn nýi samningur Verdi og Lufthansa kemur í …

Það voru 561 þúsund skráðar gistinætur hér á landi í febrúar sem er um 2,5 prósent samdráttur í samanburði sama tímabil í fyrra. Ef tekið er tillit til hlaupársdagsins þá var fækkunin ennþá meiri eða nærri 6 af hundraði. Á hótelum landsins voru gistinæturnar 373 þúsund sem er ögn meira en í febrúar í fyrra …

Þegar Hagstofan leggur mat á breytingar á verðlagi þá er meðal annars horft til fargjalda, bæði í flug innanlands og til útlanda. Samkvæmt nýjum verðmælingum Hagstofunnar þá lækkaði farið frá Keflavíkurflugvelli um 5 prósent í mars en farþegar í innanlandsflugi þurftu að borga 16 prósent meira en í fyrra. Á sama tíma hækkaði verðlag í …

„Undanfarna mánuði hafa stjórnmálamenn og verkalýðsforingjar viðrað hugmyndir um að hækka virðisaukaskattshlutfall ferðaþjónustu í 24%. Almenn greining á grundvelli viðtekinnar þjóðhagfræði, sem SAF hefur látið vinna, bendir til þess að slík hækkun myndi almennt hækka verðlag og þar með verðbólgu á viðkomandi ári, lækka veltu í ferðaþjónustu, veikja samkeppnishæfni hennar, lækka verga landsframleiðslu og auka …

Xiaomi er hraðvaxta hátæknifyrirtæki í Beijing í Kína, stofnað fyrir 14 árum af frumkvöðlinum og milljarðamæringnum Lei Jun og félögum hans. Á síðasta ári var fyrirtækið í þriðja sæti á lista þeirra sem seldu flesta farsímana - næst á eftir Samsung og Apple. Xiaomi framleiðir og selur margskonar annan háþróaðan tæknibúnað og neytendavörur en samdráttur …

Fyrir rúmu ári var greint frá því að þýska Lufthansa-samsteypan hefði áhuga á að kaupa 40 prósenta hlut í ítalska þjóðarflugfélaginu ITA en niðurstaða hefur ekki enn fengist. Í janúar hóf Framkvæmdastjórn Evrópusambandsins rannsókn á samkeppnisáhrifum þess að Þjóðverjarnir eignuðust stóran hlut í ítalska flugfélaginu sem lengi hefur verið stjórnvöldum á Ítalíu höfuðverkur.  Nú í …

Fyrir mánuði sendi Storytel frá sér fréttatilkynningu þar sem kynnt var ný þjónusta fyrir notendur. Brátt eiga hlustendur hljóðbóka möguleika á að velja nýjan lesara ef þeim líkar ekki innlesturinn. Valraddirnar eru allar skapaðar af vélmennum eða svokölluðum gervigreindarupplesurum.  Þetta nýja verkfæri Stoyrtel er tekið í gagnið vegna þess að 89 prósent af þeim sem …