Það eru sennilega flestir ef ekki allir ferðalangar með ferðatryggingu í gegnum kreditkort eða heimilistryggingu. Það nægir þó ekki alltaf nóg eins og sjá má á þessum dæmum.
Íslenskur ferðamaður sem leitar til læknis í Evrópu er mjög líklega beðinn um að framvísa Evrópska sjúkratryggingakortinu um leið og hann mætir á sjúkrahúsið. Ef ekkert er kortið þá þarf að sækja um bráðabirgðaútgáfu á því hjá Sjúkratryggingum Íslands. Í fyrra þurftu um níu hundruð einstaklingar á þess háttar skyndiafgreiðslu að halda samkvæmt upplýsingum frá stofnuninni. Það jafngildir því að um þrír íslenskir ferðalangar á dag hafi beðið um bráðabirgðaskirteini á síðasta ári. Það er um það bil tvöfalt fleiri en árið 2012.
Tryggingaskirteini koma líka að góðum notum en evrópskir heilbrigðisstarfsmenn eru líklegri til að biðja um hið samevrópska kort. Það er því vissara að hafa það í veskinu næst þegar haldið er í Evrópureisu. Sjúkratryggingakortið veitir margvísleg réttindi en ekki rétt til heimflutnings til Íslands. Það tekur heldur ekki til kostnaðar sem ekki telst vera beinn sjúkrakostnaður samkvæmt vef Sjúkratrygginga. Kortið kemur því ekki í stað hefðbundinna ferðatrygginga.
Há eigin áhætta
Það er ekki óalgengt að bílaleigur rukki aukalega um fimm þúsund krónur á dag fyrir að fella niður alla sjálfsábyrgð á ökutækjum. Á hefðbundnum bíl getur ábyrgðin numið um tvö hundruð þúsund krónum. Upphæðin er þó mismunandi eftir fyrirtækjum og bílategund. Bílaleigutrygginar eru innifaldar í einstaka kortatryggingum og þarf þá að virkja hana sérstaklega. Í þessum undantekningar tilvikum ber korthafin litla eigin áhættu en annars er leigutakinn ábyrgur fyrir allri sjálfsábyrgðinni.
Gjaldþrot flugfélaga
Þeir sem eru staddir í útlöndum þegar flugfélagið fer í gjaldþrot verða sjálfir að leggja út fyrir nýjum farmiða og gera svo kröfu í þrotabú fyrirtæksins. Sé ferðin ófarin er andvirði flugmiðans tapað nema kreditkortafyrirtækið geti afturkallað greiðsluna. Haustið 2008 fór flugfélagið Sterling í Danmörku í þrot. Fjölmargir urðu þá strandaglópar og í kjölfarið var flugfélögum, sem starfa í Danmörku, gert skylt að bjóða viðskiptavinum sínum að kaupa gjaldþrotatryggingu um leið og flugmiði er pantaður frá Danmörku. Kostar hún tuttugu danskar krónur (um 420 kr.) og er Danmörk eina landið í Evrópu sem hefur tekið upp þessa tryggingu. Besta leiðin fyrir farþega hér á landi til að tryggja sig fyrir tjóni vegna gjaldþrots flugfélags er að kaupa flugið og hótelið saman, svokallaða alferð, af aðila með ferðaskrifstofuleyfi. Þá fæst tjónið bætt með skyldutryggingu sem þess háttar fyrirtæki verða að hafa og viðkomandi verður flogið heim án aukakostnaðar.
BÍLALEIGA: HELMINGI ÓDÝRARA AÐ LEIGJA BÍL Í BYRJUN SUMARS
NÝIR ÁFANGASTAÐIR: VANCOUVER OG GENF
HÓTEL: GERÐU VERÐSAMANBURÐ Á GISTINGU
