Aðeins Danir geta tryggt sig fyrir gjaldþroti flugfélags

flugfarthegi

Icelandair og WOW air verða að bjóða upp á gjaldþrotatryggingu í Danmörku Danskir farþegar gjaldþrota flugfélaga munu njóta mun meiri réttinda en farþegar annarra þjóða. Icelandair og WOW air munu þurfa að bjóða upp á sérstaka gjaldþrotatryggingu en aðeins farþegar í Danmörku geta keypt hana.
Flugfarþegi sem er staddur í útlöndum þegar flugfélagið, sem á að flytja hann heim, fer í þrot verður að koma sér tilbaka á eigin reikning. Þeir sem eiga ónotaða miða með gjaldþrota flugfélagi fá miðana ekki endurgreidda nema kreditkortafyrirtæki viðkomandi geti afturkallað farmiðakaupin. Annars er eina leiðin til að fá tjónið bætt að gera kröfu í þrotabú viðkomandi fyrirtækis. Ferðatryggingar taka ekki til svona skaða.

Gjaldþrot Sterling markaði upphafið

Haustið 2008 stöðvaðist starfsemi danska flugfélagsins Sterling, sem var í eigu íslenskra aðila, og urðu þúsundir farþega strandaglópar í útlöndum. Í kjölfarið fór af stað umræða í Danmörku um hvernig bæta mætti stöðu flugfarþega og veita þeim sambærileg réttindi og viðskiptavinum ferðaskrifstofa. Skyldutrygging ferðaskipuleggjanda tryggir nefnilega farþegum í pakkaferð heimferð og skaðabætur ef gjaldþrot riðlar ferðaplönum. Árið 2010 var flugfarþegum í Danmörku í fyrsta skipti boðið upp á sérstaka gjaldþrotatryggingu en forsvarsmenn danskra flugfélaga hafa verið ósáttir við fyrirkomulagið þar sem erlendu flugfélögin þar í landi hafa ekki þurft að selja trygginguna. Á því verður breyting í vor því þá verða öll flugfélög, sem fljúga árlega með að lágmarki 25 þúsund farþega frá Danmörku, skyldug til að bjóða dönskum farþegum gjaldþrotatryggingu og er iðgjaldið X kr.

Sjá ekki ástæðu til fara nýju dönsku leiðina

Bæði Icelandair og WOW air bjóða upp á áætlunarflug frá Kaupmannahöfn og Billund og þurfa þar af leiðandi að hafa nýju gjaldþrotatrygginguna á boðstólum á dönskum heimasíðum sínum frá og með vorinu. Aðspurður segist Guðjón Arngrímsson, upplýsingafulltrúi Icelandair, ekki sjá sérstaka ástæðu til að taka upp þetta danska fyrirkomulag hér á landi en félagið muni að sjálfsögðu fylgja þeim reglum sem gilda í viðskiptalöndum þess. Svanhvít Friðriksdóttir hjá WOW air tekur í sama streng en segir að þessi mál hafi ekki verið skoðuð sérstaklega. Hún leggur hins vegar áherslu á að félagið fær ekki greitt frá færsluhirðum fyrr en flug hefur verið flogið. „Þar með eru farþegar WOW air, sem greiða með greiðslukorti, með ákveðna tryggingu.”

Rætt innan ESB

Ennþá hefur ekkert annað Evrópuríki fylgt fordæmi Dana en slæm réttarstaða gjaldþrota flugfélaga hefur hins vegar verið til umræðu innan Evrópusambandsins. Samkvæmt spá Evrópuráðsins má búast við að 0,07 prósent flugfarþega í álfunni muni verða fyrir skakkaföllum vegna gjaldþrota flugfélaga á tímabilinu 2011 til 2020. Alþjóðasamtök flugfélaga, IATA, hafa hins vegar lagst gegn sérstakri gjaldþrotatryggingu og hafa þess í stað gert með sér samkomulag um að bjóða strandaglópum flugmiða á sérkjörum ef eitt af aðildarfélögunum fer í þrot. Þetta á þó aðeins við um flugfélög innan IATA sem eru með rekstur innan ESB svæðisins.