Samfélagsmiðlar

Spurningar og svör: Skúli Mogensen forstjóri WOW air

Eigandi og forstjóri WOW air gerir ráð fyrir að farþegum félagsins fjölgi um nærri tvo þriðju í ár og segir kostnað fyrirtækisins vera mun lægri en keppinautanna.

skuli mogensen

Í vetur hafa farþegar WOW þurft að borga undir handfarangur sem er þyngri en 5 kíló. Var það rétt ákvörðun að innleiða þetta handfarangursgjald?
Við erum lággjaldaflugfélag og leitum allra leiða til að tryggja allra lægsta verðið fyrir flugsætið og að fólk greiði eingöngu fyrir þá þjónustu sem það notar. Handfarangursgjaldið er hluti af þeirri stefnu. Sætanýting og bókunarstaða WOW air hefur aldrei verið betri þannig að við erum mjög ánægð með okkar lággjaldastefnu.

Mun WOW air stofna fríðindaklúbb þar sem farþegar geta safnað punktum sem nota má sem greiðslu á flugmiða?
Ekki á næstunni.

Í lok mars hefst Ameríkuflug ykkar og þið hafið sagt að á næsta ári bætist nýir bandarískir áfangastaðir við leiðakerfi ykkar. Eruð þið búin að finna staðina? 
Við gerum ráð fyrir að fjöldi farþega hjá WOW air vaxi um 65 prósent í ár og að það verði áfram góður vöxtur á næsta ári. Við munum kynna áætlun fyrir árið 2016 í haust eins og venja er.

Hvaða áhrif hefur það haft á markaðinn að easyJet, næststærsta lággjaldaflugfélag Evrópu, er farið að bjóða upp á ríflega hundrað ferðir í mánuði hingað til Íslands?
Easyjet hefur stækkað markaðinn með sinni innkomu og vakið athygli á Íslandi á sínum mörkuðum sem er jákvætt fyrir heildina. Eins og fyrr segir þá erum við að vaxa um 65 prósent á milli ára og gerum ráð fyrir að halda áfram að vaxa mjög ört næstu árin með tilkomu N-Ameríku og tengiflugs sem mun svo aftur styrkja leiðakerfi okkar í Evrópu. Við berum vissulega virðingu fyrir góðum keppinautum en teljum okkur fyllilega samkeppnisfæra enda með lægri kostnaðarstrúktur en öll flugfélög sem við erum að keppa við, þar með talið Easyjet. CASK Easyjet (einingakostnaður, innsk. blm.) er ca. 8.2 US cent á meðan CASK hjá WOW í ár er áætlaður ca. 5.5 US cent. Við getum því boðið lægri fargjöld en keppinautar okkar en samt verið með jákvæða afkomu. CASK hjá WOW var 7.3 US cent í fyrra. Þessi mikla lækkun á milli ára kemur aðallega til vegna mun betri flugvélanýtingar með tilkomu Bandaríkjaflugs, lægri eldsneytiskostnaðar og hlutfallslegri lækkun yfirbyggingar miðað við 65 prósent aukningar í heildartekjum, þ.e.a.s. heildartekjur eru að aukast um 65 prósent en yfirbyggingin um innan við 10 prósent. Við erum að ná fram stærðarhagkvæmni í fyrsta sinn.

Hlutfall íslenskra farþega hefur lækkað hjá Icelandair síðustu ár og samkvæmt upplýsingum frá erlendu flugfélögunum sem hingað fljúga þá eru Íslendingar í algjörum minnihluta hjá þeim. Hvert er vægi íslenskri farþega hjá WOW air?

Fjöldi íslenskra farþega og hlutfall er mjög misjafnt eftir áfangastað en á heildina litið þá er meiri hlutfallsleg aukning erlendis frá.

WOW air keypti í síðasta mánuði sínar fyrstu flugvélar. Vélarnar eru metnar á 30 milljarða. Er hagkvæmara fyrir WOW að eiga vélar í stað þess að leigja?
WOW air hefur vaxið mjög hratt og við gerum ráð fyrir að halda þeim vexti áfram næstu árin. Þá er skynsamlegt að blanda þessu saman þ.e.a.s, bæði að kaupa og leigja vélar. Það gefur okkur sveigjanleika sem er mikilvægt í flugrekstri.

Á morgun birtast svör Birkis Hólm Guðnasonar, framkvæmdatjóra Icelandair.

Nýtt efni

Mitt inn í dimmum Grünheideskógi skammt frá Berlín hafa 80 manneskjur komið sér fyrir í kofum sem þau hafa byggt hátt uppi trjánum. Kofaþorpið eru bækistöðvar mótmælenda eða aðgerðarsinna eins og þau kalla sig. Einmitt inni í þessum sama skógi hyggst bandaríski rafmagnsbílaframleiðandinn Tesla stækka svokallaða gígaverksmiðju sem var tekin var í notkun í mars …

Lufthansa hefur náð samkomulagi við verkalýðsfélagið Verdi og þar með er endi bundinn á langa vinnudeilu við flugvallarstarfsfólk þýska flugfélagsins. Flugáætlun Lufthansa fer því ekki úr skorðum yfir páskana líkt og útlit var fyrir en félagið er með þrjár flugferðir til Íslands á áætlun sinni yfir hátíðarnar. Hinn nýi samningur Verdi og Lufthansa kemur í …

Það voru 561 þúsund skráðar gistinætur hér á landi í febrúar sem er um 2,5 prósent samdráttur í samanburði sama tímabil í fyrra. Ef tekið er tillit til hlaupársdagsins þá var fækkunin ennþá meiri eða nærri 6 af hundraði. Á hótelum landsins voru gistinæturnar 373 þúsund sem er ögn meira en í febrúar í fyrra …

Þegar Hagstofan leggur mat á breytingar á verðlagi þá er meðal annars horft til fargjalda, bæði í flug innanlands og til útlanda. Samkvæmt nýjum verðmælingum Hagstofunnar þá lækkaði farið frá Keflavíkurflugvelli um 5 prósent í mars en farþegar í innanlandsflugi þurftu að borga 16 prósent meira en í fyrra. Á sama tíma hækkaði verðlag í …

„Undanfarna mánuði hafa stjórnmálamenn og verkalýðsforingjar viðrað hugmyndir um að hækka virðisaukaskattshlutfall ferðaþjónustu í 24%. Almenn greining á grundvelli viðtekinnar þjóðhagfræði, sem SAF hefur látið vinna, bendir til þess að slík hækkun myndi almennt hækka verðlag og þar með verðbólgu á viðkomandi ári, lækka veltu í ferðaþjónustu, veikja samkeppnishæfni hennar, lækka verga landsframleiðslu og auka …

Xiaomi er hraðvaxta hátæknifyrirtæki í Beijing í Kína, stofnað fyrir 14 árum af frumkvöðlinum og milljarðamæringnum Lei Jun og félögum hans. Á síðasta ári var fyrirtækið í þriðja sæti á lista þeirra sem seldu flesta farsímana - næst á eftir Samsung og Apple. Xiaomi framleiðir og selur margskonar annan háþróaðan tæknibúnað og neytendavörur en samdráttur …

Fyrir rúmu ári var greint frá því að þýska Lufthansa-samsteypan hefði áhuga á að kaupa 40 prósenta hlut í ítalska þjóðarflugfélaginu ITA en niðurstaða hefur ekki enn fengist. Í janúar hóf Framkvæmdastjórn Evrópusambandsins rannsókn á samkeppnisáhrifum þess að Þjóðverjarnir eignuðust stóran hlut í ítalska flugfélaginu sem lengi hefur verið stjórnvöldum á Ítalíu höfuðverkur.  Nú í …

Fyrir mánuði sendi Storytel frá sér fréttatilkynningu þar sem kynnt var ný þjónusta fyrir notendur. Brátt eiga hlustendur hljóðbóka möguleika á að velja nýjan lesara ef þeim líkar ekki innlesturinn. Valraddirnar eru allar skapaðar af vélmennum eða svokölluðum gervigreindarupplesurum.  Þetta nýja verkfæri Stoyrtel er tekið í gagnið vegna þess að 89 prósent af þeim sem …