Stefnt er að því að bjóða út farmiðakaup starfsmanna stjórnarráðsins innan skamms. Vilji er til að koma í veg fyrir vildarpunktasöfnun ríkisstarfsmanna. Stefnt er að því að bjóða út farmiðakaup starfsmanna stjórnarráðsins innan skamms. Vilji er til að koma í veg fyrir vildarpunktasöfnun ríkisstarfsmanna.
Í vor komst kærunefnd útboðsmála að þeirri niðurstöðu að kaup hins opinbera á flugmiðum væru það umfangsmikil að leita þyrfti tilboða í þau á nýjan leik. Samkvæmt upplýsingum frá Ríkiskaupum er þess háttar útboð nú í vinnslu og stefnt er að því að bjóða út öll flugmiðakaup stjórnarráðsins síðar í þessum mánuði.
Fjögur og hálft ár eru liðin frá því að ríkið bauð síðast út kaup sín á farmiðum og þá bárust tilboð frá Icelandair og Iceland Express og var þeim báðum tekið. Forsvarsmenn Iceland Express kærðu seinna þá niðurstöðu og sögðust lítil viðskipti hafa fengið frá hinu opinbera þrátt fyrir samninginn.
Vildarpunktasöfnun ekki heimil
Forsvarsmenn Félags atvinnurekenda hafa lengi talað fyrir nýju útboði og í viðtali við Túrista í vor sagði Ólafur Stephensen, framkvæmdastjóri samtakanna, að það væri algjört grundvallaratriði að tekið yrði fyrir það að einstaka bjóðendur geti boðið starfsmönnum ríkisins sporslur fyrir að beina viðskiptum sínum til þeirra. „Það er í hæsta máta óeðlilegt að ríkisstarfsmenn þiggi vildarpunkta til persónulegra nota vegna flugferða sem skattgreiðendur hafa borgað fyrir,“ bætti Ólafur við. Svo virðist sem þetta sjónarmið verði ofan á því samkvæmt upplýsingum frá Ríkiskaupum þá er gert ráð fyrir því í komandi útboði að óheimilt verði að bjóða hvata til ferða hjá ákveðnu flugfélagi og reynt verður að koma í veg fyrir vildarpunktasöfnun einstaklinga. Í svari frá Ríkiskaupum er jafnframt bent á að siðareglur ráðuneytanna muni gilda fyrir samninginn og þar kemur meðal annars fram að starfsmönnum sé með öllu óheimilt að veita viðtöku hvers konar gjöfum.
Verða að velja ódýrasta flugmiðann
Um síðustu áramót leitaði danska ríkið tilboða í farmiðaviðskipti sín til 178 áfangastaða. Var samið við eitt til þrjú flugfélög um hverja flugleið og samkvæmt upplýsingum frá SKI, dönsku innkaupastofnuninni, verða opinberir starfsmenn í Danmörku í öllum tilvikum að velja ódýrasta miðann sem býðst á hverri flugleið og mega þeir aðeins beina viðskiptum til þeirra flugfélaga sem SKI samdi við. Öll kaup á farmiðum fara í gegnum ferðaskrifstofur sem fá greiddar þóknanir fyrir sína vinnu. Aðeins flugfélög sem bjóða upp á beint flug, tvisvar til þrisvar í viku gátu boðið í hverja flugleið. Félög sem geta boðið upp á tengiflug gátu einnig gert tilboð en þá verða þau að tryggja að ferðatíminn sé innan ákveðinna marka. Athygli vekur að af Ísland var ekki einn af þeim 178 áfangastöðum sem danska innkaupastofnunin bauð út. Af því að dæma eiga danskir ríkisstarfsmenn ekki oft erindi til Íslands.
