Ódýrustu farmiðarnir til Íslands gætu hækkað um 22 prósent

farthegar oslo

Nýr norskur farþegaskattur mun hækka fargjöldin frá Noregi en flugleiðin til Óslóar er sú þriðja vinsælasta á Keflavíkurflugvelli. Ríkisstjórn Noregs boðar nýjan flugmiðaskatt á næsta ári og innan fluggeirans er megn óánægja með þau áform. Flugleiðin til Óslóar er sú þriðja vinsælasta á Keflavíkurflugvelli og margir munu því finna fyrir hækkuninni hér á landi. 
Í fjárlögum norska ríkisins fyrir næsta ár er reiknað með tekjum upp á rúman milljarð norskra króna vegna nýs farþegaskatts sem byrja á að innheimta þann 1. apríl nk. Gjaldið nemur 80 norskum krónum en ofan á það bætist svo virðisaukaskattur upp á tíund og heildargjaldið verður þar af leiðandi 88 norskar sem samsvarar um 1.340 íslenskum krónum. Skatturinn verður aðeins lagður á þá farþega sem fljúga frá norskum flugvöllum en ekki á þá sem koma til Noregs. Farþegi sem flýgur héðan til Noregs myndi því aðeins borga skattinn á heimleiðinni.

Ódýrustu farmiðarnir hingað rjúka upp

Höfuðborg Noregs er alla jafna sá áfangastaður sem einna oftast er flogið til frá Keflavíkurflugvelli. Í síðasta mánuði voru ferðirnar þangað 90 talsins samkvæmt talningu Túrista og aðeins voru tíðari flugsamgöngur í boði til Lundúna og Kaupmannahafnar. Þrjú flugfélög bjóða upp á áætlunarflug til Óslóar allt árið um kring og hafa verðkannanir Túrista endurtekið sýnt að norska flugfélagið Norwegian býður alla jafna lægstu fargjöldin hingað til og frá norsku höfuðborginni. Ódýrustu flugmiðar Norwegian í Íslandsfluginu kosta 399 norskar en þegar nýi farþegaskatturinn bætist við þá gæti fargjaldið fara upp í að minnsta kosti 487 norskar sem jafngildir 7.420 krónum. Flugfélögin sjálf gætu hins vegar tekið á sig hluta af hækkuninni en forsvarsmenn Norwegian og SAS hafa hins vegar gefið út að skatturinn muni mjög líklega skila sér út í verðlagið að öllu leyti.

Gæti markað endalok flugvalla

Stjórnendur stærstu flugfélaga Noregs eru ekki þeir einu sem hafa gagnrýnt þennan nýja skattstofn því flugvallarstjóri Rygge flugvallar, í útjaðri Óslóar, segir í viðtali við Aftenposten að þetta nýja útspil geti gert út af við flugvöllinn og þar með myndu þúsund manns missa vinnuna. Ein helsta ástæða þess að starfsemi Rygge flugvallar er svona viðkvæm fyrir verðbreytingum er sú að lággjaldaflugfélög eins og Ryanair eru meðal umsvifamestu flugfélaganna á vellinum. Frammámenn í norska fluggeiranum telja líka hættu á að flugleiðir sem í dag standi tæpt muni leggjast af þegar skattahækkunin tekur gildi. Það mun sérstaklega eiga við um innanlandsflugið því þar mun farþegagjaldið leggjast á báða leggi, öfugt við millilandaflugið. Farmiði milli Óslóar og Bergen gæti því hækkað um 176 norskar krónur, eða um nærri 2700 íslenskar krónur, frá og með næsta vori.