Sem fyrr eru Spánarstrendur mjög áberandi á sumardagskrá stærstu ferðaskrifstofa landsins eins og hér má sjá. Sem fyrr eru Spánarstrendur mjög áberandi á sumardagskrá stærstu ferðaskrifstofa landsins. Hinir kostirnir eru Krít og Antalya í Tyrklandi.
Yfir sumarmánuðina í fyrra flugu ríflega 135 þúsund íslenskir farþegar frá Keflavíkurflugvelli og fjölgaði þeim um tíund frá þarsíðasta sumri. Hversu stór hluti þessara Íslendinga var á leið í sólarlandaferð er ekki vitað en væntanlega hafa þeir verið fjölmargir því framboð á klassískum pakkaferðum í sólina jókst töluvert síðasta sumar og ekki hefur dregið úr því í ár. Í sumar verður til að mynda flogið oftar til Tenerife en áður og í fyrsta skipti í áratug gefst færi á sumarferðum til Kanarí. Hingað til hafa heimsóknir Íslendinga þangað einskorðast við vetrarmánuðina.
Eingöngu þrjú lönd á boðstólum
Kanarí og Tenerife eru hins vegar ekki einu spænsku eyjurnar sem komast á blað hjá íslensku ferðaskrifstofunum því Mallorca-ferðir eru í boði á ný eftir nokkurra ára fjarveru úr sölubæklingum ferðaskrifstofa. Mallorca þótti nefnilega of dýr fyrir íslenska ferðalanga árin eftir hrun en komst á kortið á ný í fyrra. Í sumar munu þrjár stærstu ferðaskrifstofur landsins, Heimsferðir, Vita og Úrval-Útsýn bjóða upp á vikulegar ferðir þangað en áfangastaðir þessara þriggja ferðaskrifstofa er margir hverjir þeir sömu eins og sjá má á kortinu hér fyrir neðan. Úrval-Útsýn heldur sig við spænska sólarstaði í ár og sömu sögu er að segja um Gaman ferðir en Vita og Heimsferðir bjóða einnig upp á ferðir til Krítar. Nazar er hins vegar eitt um ferðir til Tyrklands í ár en þessi norræna ferðaskrifstofa er með úrval af ferðum á strendur í nágrenni við Antalya.
Hér fyrir neðan má sjá þá sólarstaði sem flogið verður reglulega til í sumar en auk þessara ferða eru í boði stakar ferðir á hina og þessa staði.
