Dómur sem féll í vikunni gæti hugsanlega haft veruleg áhrif á gistimarkaðinn hér á landi. Dómur sem féll í vikunni gæti hugsanlega haft veruleg áhrif á gistimarkaðinn hér á landi.
Óheimilt er að reka gististað í fjölbýlishúsi án samþykkis allra félagsmanna í húsfélaginu samkvæmt dómi sem kveðinn var upp í Héraðsdómi Reykjavíkur í vikunni. Málsatvik eru þau að húseigendafélag fjölbýlishúss í Skuggahverfi stefndi eigendum þriggja íbúða í eigninni sem leigðar eru út til ferðamanna allt árið um kring. Vildu aðrir íbúar hússins meina að séreign þess væri ætluð til íbúðar en ekki atvinnureksturs og þess háttar nýting valdi ónæði. Gestirnir staldri stutt við og hafi þar með enga ábyrgðartilfinningu fyrir eigninni og séu ekki bundnir af félagslegum skyldum og tillitssemi við nágranna sína. Í stuttu máli sagt þá tók dómarinn undir kröfur íbúanna og verða eigendur hótelíbúðanna því að fá samþykki frá öðrum eigendum fyrir starfsemi sinni.
Lögfræðingar Reyjavíkurborgar skoða málið
Dagur B. Eggertsson, borgarstjóri, gerði dóminn að umtalsefni á Facebook síðu sinni í vikunni og sagði að áhrif hans gætu orðið umtalsverð verði honum ekki hnekkt. „Mér sýnist dómurinn geta haft veruleg áhrif á réttarstöðu einstaklinga til að sporna við því að íbúðum í fjölbýlishúsum, þar sem þeir búa, sé breytt í gististaði fyrir ferðamenn.“ Borgarstjóri bætti því við að dómurinn gæti til að mynda unnið gegn því að ferðamannagisting ýti út íbúðarhúsnæði á stórum svæðum í borginni. Lögfræðingar Reykjavíkurborgar rýna nú í dóminn samkvæmt Facebook-færslu borgarstjóra en eins og áður segir þá liggur ekki fyrir hvort honum verði áfrýjað til Hæstaréttar.
Airbnb stærra en íslensku hótelkeðjunnar
Mikill vöxtur hefur orðið í útleigu á íbúðum til ferðamanna hér á landi síðustu ár og til að mynda hefur fjöldi íslenskra gistikosta á skrá Airbnb tvöfaldast síðastliðið ár. Á skrá fyrirtækisins eru í dag um fjögur þúsund gistirými hér á landi sem er meira en samanlagður herbergjafjöldi á þremur stærstu hótelkeðjum landsins. Miðað við íbúafjölda þá er Airbnb mörgum sinnum umsvifameira á Íslandi en í nágrannalöndunum.
Íslensk skattayfirvöld í sambandi við leigumiðlara
Umsvif Airbnb aukast ekki aðeins hratt hér á landi og víða um heim reyna yfirvöld að takmarka útbreiðslu Airbnb og álíka fyrirtækja. Ástæðan er meðal annars sú að nágrannar íbúðanna verða fyrir ónæði og eins er talið að ferðamannagisting valdi hækkun á leigu og fasteignaverði. Einnig er hefur verið sýnt fram á að víða hafa leigusalar ekki tilskilin leyfi eða standa skil á opinberum gjöldum. Það er t.d. reynsla yfirvalda í París sem hafa nýlega skikkað Airbnb til að innheimta gistináttagjald af gestum sínum í stað þess að láta leigusalana sjálfa gera það. Eins og Túristi greindi nýverið frá þá hafa skattayfirvöld hér á landi sett sig í samband við fyrirtæki eins og Airbnb og önnur álíka til að tryggja að réttir skattar og gjöld séu greidd af viðskiptunum hér á landi.
