Samfélagsmiðlar

Norskum flugvelli lokað vegna nýs farþegaskatts

farthegar oslo

Í fyrra fóru 1,6 milljónir farþega um Rygge flugvöll við Óslóarfjörð en í lok árs verður flugstöðinni lokað vegna aukinna álaga á norska fluggeirann. Í fyrra fóru 1,6 milljónir farþega um Rygge flugvöll við Óslóarfjörð en í lok árs verður flugstöðinni lokað vegna aukinna álaga á norska fluggeirann. Farþegar sem fljúga til Íslands frá Noregi verða líka skattlagðir.
Í fjárlögum norska ríkisins í ár er reiknað með tekjum upp á rúman milljarð norskra króna vegna nýs farþegaskatts. Upphaflega stóð til að leggja skattinn á í lok vetrar en gildistökunni var frestað til 1. júní. Gjaldið nemur 80 norskum krónum en ofan á það bætist virðisaukaskattur upp á tíund og heildargjaldið verður þar af leiðandi 88 norskar sem samsvarar um 1.300 íslenskum krónum. Þessar auknu álögur hafa mætt mikilli andstöðu í norska fluggeiranum og hafa forsvarsmenn flugfélaganna SAS og Norwegian meðal annars boðað að flugleiðir sem ekki eru nægjanlega ábatasamar verði lagðar niður. Stjórnendur Avinor, sem sér um rekstur flugvalla í eigu norska ríkisins, óttast að gjaldið verði til þess að flugfélög í landinu flytji hluti af starfsemi sinni til nágrannalandanna þar sem gjöldin eru lægri. Alþjóðasamtök flugfélaga, IATA, hafa í umsögn sinni um brottfarargjöldin sagt þau stríða gegn alþjóðlegum samþykktum og ferðamálasamtök Noregs hafa einnig mótmælt þeim. 

1000 störf hverfa

Flugvallarstjórinn á Moss-Rygge flugvelli við Óslóarfjörð hefur hins vegar farið fremstur í andstöðunni gegn skattinum. Ástæðan er sú að írska lággjaldaflugfélagið Ryanair stendur undir bróðurparti allra umsvifa á þessum gamla herflugvelli og Írarnir gáfu út í vetur að þeir myndu leggja niður starfsstöð sína við Rygge ef farþegaskatturinn yrði að veruleika. Í fyrra fóru 1,6 milljónir farþega um Rygge flugvöll og þar af voru ríflega milljón á leið í flug með Ryanair. Án lággjaldaflugfélagsins er engin rekstrargrundvöllur fyrir flugvöllinn að mati flugvallarstjórans og í gær var tilkynnt að eigendur Rygge muni loka flughöfninni 1. nóvember næstkomandi þegar vetrardagskrá flugfélaganna hefst. Þar með leggjast niður um þúsund störf í tengslum við flugvallarsvæðið en Siv Jensen, fjármálaráðherra Noregs, sagði á norska stórþinginu í gær að hún teldi að ekkert yrði úr þessari lokun flugvallarins. Hún gagnrýndi hins vegar málatilbúnað Ryanair og formaður stéttarfélagsins flugvallarstarfsmanna (Parat) hefur sakað Ryanair um að beita hótunum til að ná sínu fram.

Hugmyndir um margfalt hærra gjald hér á landi

Sem fyrr segir nemur nýi norski farþegaskatturinn rúmum 1300 íslenskum krónum en til samanburðar lagði Friðrik Pálsson, fyrrum stjórnarformaður Íslandsstofu, nýverið til, í viðtali við Morgunblaðið, að allir ferðamenn sem hingað koma yrðu að greiða þrjú til fimm þúsund króna framlag í sérstakan sjóð. Guðni Ágústsson, fyrrum formaður Framsóknarflokksins, var á sömu línu í aðsendri grein í sama blaði. Í kjölfarið sagði talskona SAS, stærsta flugfélags Norðurlanda, í viðtali við Túrista, að þess háttar gjaldtaka gæti haft eyðileggjandi áhrif á íslenska ferðaþjónustu og almennt leitt til þess að framboð á flugi til landsins dragist saman.

Nýtt efni

Mitt inn í dimmum Grünheideskógi skammt frá Berlín hafa 80 manneskjur komið sér fyrir í kofum sem þau hafa byggt hátt uppi trjánum. Kofaþorpið eru bækistöðvar mótmælenda eða aðgerðarsinna eins og þau kalla sig. Einmitt inni í þessum sama skógi hyggst bandaríski rafmagnsbílaframleiðandinn Tesla stækka svokallaða gígaverksmiðju sem var tekin var í notkun í mars …

Lufthansa hefur náð samkomulagi við verkalýðsfélagið Verdi og þar með er endi bundinn á langa vinnudeilu við flugvallarstarfsfólk þýska flugfélagsins. Flugáætlun Lufthansa fer því ekki úr skorðum yfir páskana líkt og útlit var fyrir en félagið er með þrjár flugferðir til Íslands á áætlun sinni yfir hátíðarnar. Hinn nýi samningur Verdi og Lufthansa kemur í …

Það voru 561 þúsund skráðar gistinætur hér á landi í febrúar sem er um 2,5 prósent samdráttur í samanburði sama tímabil í fyrra. Ef tekið er tillit til hlaupársdagsins þá var fækkunin ennþá meiri eða nærri 6 af hundraði. Á hótelum landsins voru gistinæturnar 373 þúsund sem er ögn meira en í febrúar í fyrra …

Þegar Hagstofan leggur mat á breytingar á verðlagi þá er meðal annars horft til fargjalda, bæði í flug innanlands og til útlanda. Samkvæmt nýjum verðmælingum Hagstofunnar þá lækkaði farið frá Keflavíkurflugvelli um 5 prósent í mars en farþegar í innanlandsflugi þurftu að borga 16 prósent meira en í fyrra. Á sama tíma hækkaði verðlag í …

„Undanfarna mánuði hafa stjórnmálamenn og verkalýðsforingjar viðrað hugmyndir um að hækka virðisaukaskattshlutfall ferðaþjónustu í 24%. Almenn greining á grundvelli viðtekinnar þjóðhagfræði, sem SAF hefur látið vinna, bendir til þess að slík hækkun myndi almennt hækka verðlag og þar með verðbólgu á viðkomandi ári, lækka veltu í ferðaþjónustu, veikja samkeppnishæfni hennar, lækka verga landsframleiðslu og auka …

Xiaomi er hraðvaxta hátæknifyrirtæki í Beijing í Kína, stofnað fyrir 14 árum af frumkvöðlinum og milljarðamæringnum Lei Jun og félögum hans. Á síðasta ári var fyrirtækið í þriðja sæti á lista þeirra sem seldu flesta farsímana - næst á eftir Samsung og Apple. Xiaomi framleiðir og selur margskonar annan háþróaðan tæknibúnað og neytendavörur en samdráttur …

Fyrir rúmu ári var greint frá því að þýska Lufthansa-samsteypan hefði áhuga á að kaupa 40 prósenta hlut í ítalska þjóðarflugfélaginu ITA en niðurstaða hefur ekki enn fengist. Í janúar hóf Framkvæmdastjórn Evrópusambandsins rannsókn á samkeppnisáhrifum þess að Þjóðverjarnir eignuðust stóran hlut í ítalska flugfélaginu sem lengi hefur verið stjórnvöldum á Ítalíu höfuðverkur.  Nú í …

Fyrir mánuði sendi Storytel frá sér fréttatilkynningu þar sem kynnt var ný þjónusta fyrir notendur. Brátt eiga hlustendur hljóðbóka möguleika á að velja nýjan lesara ef þeim líkar ekki innlesturinn. Valraddirnar eru allar skapaðar af vélmennum eða svokölluðum gervigreindarupplesurum.  Þetta nýja verkfæri Stoyrtel er tekið í gagnið vegna þess að 89 prósent af þeim sem …