Síðustu vetur hafa þotur Icelandair flogið eina til tvær ferðir á dag til flugvallanna JFK og Newark og fleiri hafa áætlunarferðirnar til New York ekki verið í skammdeginu. Í ár hóf hið bandaríska Delta Air Lines reyndar vertíð sína hér á landi í febrúar en árin á undan hafði Íslandsflug félagsins einskorðast við sumarmánuðina. Þá eykst umferðin og nú í sumar hafa Icelandair og Delta samanlagt boðið upp á fjórar ferðir á dag milli Íslands og New York. Í vetur verða daglegar ferðir álíka margar og þær hafa verið síðustu mánuði því nú mun Delta fljúga allt árið til Íslands frá heimahöfn sinni á JFK og í lok nóvember fer WOW air jómfrúarferð sína til Newark í New Jersey. Ferðir Delta verða fjórar í viku en WOW fer leiðina daglega líkt og Icelandair.

Ódýrara að fara í desember en nóvember

Samkeppnin í fluginu til New York verður því miklu meiri næstu mánuði en nokkurn tíma áður og því forvitnilegt að fylgjast með þróun fargjalda á þessari leið næstu misseri. Til að mynda í kringum helgar en öll þrjú félögin munu bjóða upp á ferðir héðan á föstudögum og heim frá New York á mánudögum. Munurinn á fargjöldum félaganna á þessum vikudögum í lok árs er hins vegar töluverður eins og nýjasta verðkönnun Túrista leiðir í ljós. Í nóvember bíður Icelandair nokkru ódýrari miða en Delta en eftir að WOW slæst í hópinn þá er það félag með lægstu fargjöldin. Og reyndar lækkar þá líka verðið hjá Delta og Icelandair. Það er s.s. ódýrara að fljúga til New York yfir helgi í desember en í nóvember eins og staðan er í dag. Þess ber að geta að farangursgjaldi er bætt við farmiðaverðið hjá WOW en farþegar Icelandair fá að taka með sér tvær töskur án viðbótarkostnaðar.