Í lítrum talið hefur sala á áfengi dregist saman í komuverslun Fríhafnarinnar því nú velja fleiri að kaupa vín og sterkt áfengi í stað bjórsins Í lítrum talið hefur sala á áfengi dregist saman í komuverslun Fríhafnarinnar því nú velja fleiri að kaupa vín og sterkt áfengi í stað bjórsins.
Í sumarbyrjun var reglum um áfengiskaup ferðamanna breytt á þann veg að nú geta þeir nýtt allan tollinn til kaupa á aðeins sterku áfengi, léttvíni eða bjór. Áður þurfti að blanda saman sortum í samræmi við fimm ólíkar samsetningar. Fyrir þessa breytingu var í mesta lagi hægt að kaupa einn lítra af sterku áfengi en nú er hámarkið 1,5 lítrar og sá sem vill eingöngu vín getur nú tekið 6 flöskur í stað fjögurra. Á sama hátt getur ferðamaður sem aðeins kýs bjór keypt sex hálfs lítra kippur af öli en áður var hámarkið 4 kippur.
Of margar einingar í vinsælustu leiðunum
Þeir sem velja síðasta kostinn eru hins vegar ekki mjög fjölmennur hópur því sala á áfengi, í lítrum talið, hefur dregist saman í Fríhöfninni eftir að nýju reglurnar tóku gildi líkt og Túristi greindi frá. Í forsendum frumvarps fjármálaráðherra um þennan nýja tollkvóta var hins vegar búist við aukinni sölu í komuverslun Fríhafnarinnar. Ástæðan fyrir þessari öfugu þróun er, að mati Þorgerðar Þráinsdóttur framkvæmdastjóra Fríhafnarinnar, sú að þær leiðir sem nutu mestra vinsælda í gamla kerfinu innihalda of margar áfengiseiningar miðað við nýja fyrirkomulagið (sjá mynd hér fyrir neðan). „Þeir sem notfæra sér aukninguna sem varð ef keyptur er eingöngu bjór eru ekki nógu margir til að vega upp á móti þeim sem kaupa helst minni bjór með sterku og léttu áfengi. Þetta hefur leitt til þess að bjór hefur minnkað nokkuð í magni sem hlutfall af heildarsölu. Sjötíu prósent af þeim bjór sem seldur er í komuverslun Fríhafnarinnar er innlend framleiðsla og því hefur þetta nokkur áhrif á innlenda bjórframleiðendur og mun til lengri tíma geta haft töluverð áhrif á sölu á íslenskum bjór,” bætir Þorgerður við.
Innlend framleiðsla verður undir
Undir þetta taka forsvarsmenn Vífilfells og Ölgerðarinnar, tveggja umsvifamestu bjórframleiðenda landsins og segja að þessi þróun komi ekki á óvart. „Það er sorglegt að þessar breytingar bitni á innlendri framleiðslu en sala á innfluttu léttvíni aukist,“ segir Erla Jóna Einarsdóttir hjá Ölgerðarinni og Hreiðar Þór Jónsson hjá Vífilfelli er sömu skoðunar. „Þetta er auðvitað mjög óheppilegt þar sem bjórinn er að megninu til framleiddur á Íslandi á meðan stór hluti af sterka áfenginu og allt vínið er flutt inn.” Og Hreiðar á ekki von á því að þetta breytist með tímanum því fólk sem áður hafi keypt ákveðið magn af bjór með öðrum tegundum geri það ekki lengur. „Nú tekur „vínáhugamaðurinn” bara vín í stað blöndu af víni og bjór eins og hann gerði áður.” Það er því betra hljóð í vínheildsölum en bjórframleiðendum þessa dagana og til að mynda segist Sigurður Hannesson, hjá RJC, vera sáttur við þá reynslu sem komin er á nýju reglurnar því sala á léttvíni hafi aukist talsvert síðustu mánuði.
Hefur ekki einfaldað málin
Í lagafrumvarpinu um breytingar á tollkvótanum var ekki aðeins reiknað með aukinni sölu heldur átti nýja fyrirkomulagið líka að vera einfaldara í framkvæmd fyrir viðskiptavini og starfsmenn Fríhafnarinnar. Það hefur hins vegar heldur ekki reynst raunin því að sögn Þorgerðar, framkvæmdastjóra Fríhafnarinnar, þá vefjast nýju reglurnar fyrir viðskiptavininum og það sem af er hefur vinna Fríhafnarstarfsmanna við að útskýra tollkvótann verið miklu meiri en það sem áður var.
