Sóknarfæri WOW liggja í fjölgun skiptifarþega

wow skuli airbus

Skúli Mogensen gerir ráð fyrir 3 milljónum farþega og vonast til að hlutfall tengifarþega aukist því Ísland ráði ekki við mikið meiri vöxt eins og er. Skúli Mogensen gerir ráð fyrir 3 milljónum farþega með WOW á næsta ári og vonast til að hlutfall tengifarþega aukist því Ísland ráði ekki við mikið meiri vöxt eins og er.
Það stefnir í að farþegafjöldi WOW air í ár verði tvöfalt meiri en í fyrra og að vöxturinn verði jafn mikill á næsta ári. Ef þessar áætlanir ganga eftir mun félagið flytja þrjár milljónir farþega á næsta ári sem álíka fjöldi og sat í vélum Icelandair á síðasta ári.
Til að ná fram þessari miklu aukningu mun félagið bæta við áfangastöðum og fjölga ferðum til þeirra borga sem nú þegar eru hluti af leiðakerfi félagsins að sögn Skúla Mogensen forstjóra og eiganda WOW air. „Í nóvember bætist tólfta þotan við flugflota WOW og verður hún nýtt í flug okkar til New York. Í apríl og maí bætast svo við fimm þotur í viðbót og á sama tíma hefst áætlunarflug til Miami á Flórída. Eins munum bæta við ferðum til Kaliforníu og fljúga daglega til Los Angeles og San Francisco frá og með vorinu.” Að sögn Skúla verða fleiri nýir áfangastaðir kynntir til sögunnar fljótlega.

Spár greiningaraðila ekki í takt við flugáætlanir

Hlutfall skiptifarþega um borð í vélum WOW air fer ört hækkandi og lætur nærri að um helmingur farþeganna millilendi aðeins á Keflavíkurflugvelli á leið sinni yfir hafið. Skúli segir tækifæri WOW helst liggja í því að stækka þennan hóp enn frekar enda ráði innviðirnir á Íslandi ekki við mikið meiri vöxt ferðamanna eins og er að hans mati. Aðspurður um hvort að það sé hins vegar ekki óumflýjanlegt að ferðamannafjöldinn hér á landi vaxi í takt við aukin umsvif Icelandair og WOW air segir Skúli að sterkt samband sé þarna á milli. „Áætlanir og spár opinberra- og einkaaðila um ferðamannafjölda hafa verið of varkárar í gegnum tíðina þrátt fyrir þær augljósu staðreyndir sem komi fram í áætlunum WOW og Icelandair.”

7,2 milljónir með íslensku félögunum tveimur

Sem fyrr segir er gert ráð fyrir að farþegafjöldinn hjá WOW verði þrjár milljónir á næsta ári en áður hafa forsvarsmenn Icelandair gefið út að félagið ráðgeri að flytja 4,2 milljónir farþega. Samkvæmt ársskýrslu Icelandair í fyrra þá var hlutfall erlendra ferðamanna í vélum félagsins 36 prósent en ekki liggur fyrir hvert hlutfallið er hjá WOW. En að því gefnu að það sé álíka hátt og hjá Icelandair þá má gera ráð fyrir að félögin tvö komi með á bilinu 1,3 til 1,6 milljónir erlendra ferðamanna til landsins á næsta ári. Inn í þeirri tölu eru svokallaðir „stop-over” farþegar Icelandair, þ.e. fólk sem kemur inn til landsins á leið sinni yfir hafið. Hafa ber í huga að hver farþegi flugfélaganna er talinn tvisvar, þ.e. á útleið og heimleið og á næsta ári munu þá um 3,6 milljónir einstaklinga sitja um borð í vélum Icelandair og WOW ef áætlanirnar ganga eftir.

2,5 milljónir ferðamanna?

Hver umsvif erlendu flugfélaganna verða á Keflavíkurflugvelli á næsta ári liggur ekki fyrir en ljóst er að British Airways fjölgar sínum ferðum hingað frá London úr þremur í sjö í viku og einnig hafa Norwegian, Germania og Wizz tilkynnt um aukið Íslandsflug. Á næsta ári mun Delta svo í fyrsta skipti fljúga hingað allt árið um kring frá New York en hins vegar hefur hið breska easyJet fækkað ferðum sínum til Íslands síðustu mánuði í samanburði við sama tíma í fyrra en forsvarsmenn félagsins hafa gefið út að ákvörðun Breta að segja skilið við ESB muni hafa neikvæð áhrif á reksturinn á næstu misserum. Airberlin, sem var umsvifamesta erlenda flugfélagið á Íslandi í ágúst, er í miklum rekstrarvanda og mikill niðurskurður framundan fyrir næstu sumarvertíð þar á bæ. 
Hvað sem því líður er ljóst að ef áætlanir íslensku flugfélaganna ganga eftir og ef umsvif erlendu flugfélaganan aukast lítillega gæti ferðamannafjöldinn náð 2,5 milljónum. En eins og víða hefur komið fram síðustu vikur þá gæti sífellt hækkandi gengi íslensku krónunnar dregið úr eftirspurn eftir Íslandsferðum á næstu misserum og margir fleiri þættir hafa líka áhrif.