Um áramót gengu í gildi nýjar og hertari reglur um skammtímaleigu á húsnæði. Um áramót gengu í gildi nýjar og hertari reglur um skammtímaleigu á húsnæði.
Frá og með gærdeginum takmarkast skammtímaleiga á íbúðahúsnæði við 90 daga á almanaksárinu og hámarkstekjur af útleigunni mega ekki nema meira en 2 milljónum yfir árið. Hver einstaklingur getur skipt þessum 90 dögum milli tveggja eigna, til dæmis íbúðarhúsnæði og sumarbústaðar. Með breytingunum er verið að skýra betur mörkin milli gististarfsemi í atvinnuskyni og tímabundinnar leigu einstaklinga gegnum deilihagkerfið samkvæmt tilkynningu frá Atvinnuvegaráðuneytinu.
En líkt og kom fram í nýlegri úttekt Íslandsbanka þá var að jafnaði áttunda hver íbúð í miðborg Reykjavíkur leigð út til ferðamanna í júlí sl. á vegum Airbnb. Umsvif þessa bandaríska fyrirtækisins hafa vaxið mjög hratt hér á landi í takt við aukin ferðamannastraum og samkvæmt svari fyrirtækisins við fyrirspurn Túrista í janúar 2016 þá hafði fjöldi íslenskra skráninga hjá Airbnb tvöfaldast frá byrjun árs 2015 og fyrirtækið hafði þá á sínum snærum fleiri gistikosti hér á landi en þrjár stærstu hótelkeðjur landsins samanlagt.
Leyfisnúmer komi fram í auglýsingum
Það er Sýslumaðurinn á höfuðborgarsvæðinu sem fer með eftirlit með heimagistingu samkvæmt reglugerð nýju laganna og verða allir leigusalar að skrá fasteignir sínar hjá embættinu og kostar það 8 þúsund krónur. Ef eign er leigð út í heimagistingu án þess að hún hafi verið skráð verður lögð á eigandann stjórnvaldssekt og getur upphæð hennar numið frá 10 þúsund kr. upp í eina milljón kr. Skráningarnúmerið sem fæst hjá sýslumanni skal jafnframt nota í markaðssetningu á fasteigninni, t.d. á bókunarvefsíðum eins og Airbnb. Samkvæmt lauslegri athugun Túrista eru skráningarnúmer ennþá ekki sýnileg á auglýsingum Airbnb á íslenskum gistikostum.
Spurningar og svör varðandi heimagistingu – Frá Atvinnuvegaráðuneytinu
Hvað má leigja fasteign út í marga daga þannig að hún falli undir reglur um heimagistingu?
Svar: 90 daga á ári.
Hvað má leigja út margar fasteignir?
Svar: Tvær eignir.
Hvað þarf að gera ef leigja á út herbergi, íbúð eða sumarbústað í heimagistingu?
Svar: Skrá viðkomandi eign hjá Sýslumanninum á höfuðborgarsvæðinu og fá starfsleyfi hjá heilbrigðisnefnd. Eignin fær svo úthlutað skráningarnúmeri sem þarf að nota við markaðssetningu.
Hver sér um eftirlit með heimagistingu?
Svar: Lögreglustjórar hafa áfram eftirlit með framkvæmd laganna skv. 21. gr. laganna. Sýslumaðurinn á höfuðborgarsvæðinu hefur hins vegar eftirlit með heimagistingu og mun hann til dæmis fylgjast með því að skráningarnúmer sé notað á þeim miðlum sem notaðir eru til að auglýsa heimagistingu.
Hvað þarf að gera ef leyfi fyrir heimagistingu er þegar fyrir hendi á grundvelli eldri laga og ætlunin er að leigja eignina meira en 90 daga á ári?
Svar: Leyfið gildir út gildistímann. Þegar það rennur út þarf að sækja um rekstrarleyfi fyrir gististað í flokki II.
Hvað gerist ef eign er leigð út í heimagistingu án þess að hún hafi verið skráð hjá Sýslumanni?
Svar: Þá verður lögð á stjórnvaldssekt sem getur numið allt að einni milljón króna.
Er mikilvægt að nota skráningarnúmerið í öllum auglýsingum?
Svar: Já, það er lögbundin skylda. Brot á því getur valdið stjórnvaldssekt.