Útlendingar í meirihluta í Keflavíkurfluginu frá Akureyri

Á meðan innanlandsflug er veigamikill hluti af starfsemi alþjóðaflugvalla í löndunum í kringum okkur þá hafa farþegar á Keflavíkurflugvelli aðeins átt kost á því að fljúga þaðan til útlanda. Flugfélag Íslands hefur reyndar boðið upp á stakar ferðir milli Akureyrar og Keflavíkurflugvallar yfir hásumarið undanfarin ár en í febrúar síðastliðnum hóf félagið að fljúga þessa leið allt að sex sinnum í viku. Þetta er í fyrsta skipti sem innanlands- og millilandaflug er tengt saman hér á landi yfir vetrarmánuðina og samkvæmt upplýsingum frá Flugfélagi Íslands þá nýttu sér rúmlega 2600 farþegar þessar samgöngur í mars og apríl. Sjö af hverjum tíu farþegum á þessari flugleið eru útlendingar.

Tíminn nýtist í ferðalag um Norðurland í stað akstur frá höfuðborginni

Arnheiður Jóhannsdóttir, framkvæmdastjóri Markaðsstofu Norðurlands, segir þetta tengiflug hafa opnað nýja möguleika fyrir ferðafólk sem vill komast norður á þeim árstíma sem hefur verið erfiður vegna ófærðar á vegum eða akstursskilyrða sem útlendingar treysta sér ekki í. „Þetta er því gríðarlega mikilvæg viðbót og sérstaklega ánægjulegt að heyra að ferðaþjónustufyrirtæki á Norðurlandi hafa orðið vör við þessa ferðamenn á svæðinu. Þrátt fyrir byrjunarörðugleika í framkvæmd á fluginu hafa flestir þeirra erlendu gesta sem hafa nýtt sér það lýst yfir mikilli ánægju með þennan valkost. Það eykur án efa nýtinguna á fluginu að það er í boði yfir vetrartímann því þá vilja heimamenn gjarnan komast til útlanda og fyrir erlenda ferðamenn opnast möguleiki á að komast í vetrarparadís án þess að þurfa að bæta við mörgum ferðadögum. Þetta flug gerir útlendingum því kleift að ferðast meira um Norðurland í stað þess að tími þeirra fari í akstur hingað frá Reykjavík.“

Ókostur að fækka flugum yfir sumarið

Sem fyrr segir þá hefur hlutfall íslenskra farþega í Keflavíkurfluginu frá Akureyri verið um 30 prósent og segir Arnheiður bæði einstaklinga og fyrirtæki á svæðinu nýta sér þessa viðbót við samgöngurnar þaðan. Í sumar fækkar hins vegar flugunum á þessari leið og að sögn Arnheiðar líta margir fyrir norðan á það sem ókost. „Bæði er það óheppilegt fyrir þau fyrirtæki á Norðurlandi sem hafa nýtt flugið fyrir starfsmenn sína og einnig fyrir ferðaþjónustuaðila sem eru að selja erlendum ferðamönnum ferðir hingað og þyrftu að geta boðið reglulegri og tíðari flug. Það er trú okkar að eftirspurnin verði svo mikil að þetta muni breytast strax á næsta ári og að ferðafjöldinn muni haldast jafn allt árið.“ Arnheiður bætir því við að ferðaskrifstofur séu byrjaðar að selja pakkaferðir sem byggist á tengifluginu en gera megi ráð fyrir því að það taki að minnsta kosti eitt ár að byggja upp eftirspurnina.
Í því samhengi má benda á að stór hluti af ferðamannastraumnum til Rovaniemi í Lapplandi byggir einmitt á því að erlendir farþegar geti flogið til N-Finnlands stuttu eftir komuna til Helsinki að sögn Sanna Kärkkäinen, framkvæmdastjóra ferðamálaráðs Roveniemi. Hún segir, í samtali við Túrista, að vetrarferðamennska í Lapplandi hefur verið í örum vexti og fjölgaði komum erlendra ferðamanna um fimmtung milli síðustu tveggja ára í Rovaniemi. Bærinn hefur m.a. kynnt sig sem heimkynni jólasveinsins og einnig er þar mikið gert út á norðurljósaferðir.

Mun tíðari ferðir innan nágrannalandanna

Vægi farþega í innanlandsflugi á stærstu flugstöðvum Norðurlanda er mjög misjafnt. Á Óslóarflugvelli er það hæst eða 43 prósent en aðeins 6 prósent á Kaupmannahafnarflugvelli. Á Arlanda í Stokkhólmi er um fimmti hver farþegi á ferðalagi innan Svíþjóðar og hlutfallið er 16% í flugstöðinni í Helsinki. Á Keflavíkurflugvelli hefur vægið verið 0,2% í síðasta mánuði en þó ber að hafa í huga að Akureyrarflugið þaðan er ekki hefðbundið innanlandsflug því það er aðeins í boði fyrir þá sem eru á leið út í heim. Áfangastaðirnir í innanlandsfluginu frá hinum norrænu flughöfnunum eru því skiljanlega miklu fleiri, samkeppni ríkir á mörgum á flugleiðunum og ferðirnar oft tíðar. Þannig geta íbúar Rovaniemi valið á milli 4 til 6 brottfara á dag til Helsinki flugvallar með Finnair eða Norwegian.

Fargjöldin svipuð

Sá sem ákveður í dag að kaupa farmiða frá Roveniemi til Helsinki næsta vetur borgar að lágmarki 11.860 kr. hjá Finnair en tæpar 9 þúsund kr. hjá Norwegian. Ódýrustu farmiðarnir milli Akureyrar og Keflavíkurflugvallar kosta 10.580 krónur, báðar leiðir. Hjá þessum þremur flugfélögum bætist við farangursgjald. Ferðatíminn á finnsku flugleiðinni er um hálftíma lengri en á þeirri íslensku og ferðirnar eru líka tíðari. Samanburðurinn er því ekki fullkominn en Akureyri og Rovaniemi eiga það þó sameiginlegt að vera áfangastaðir sem eru komnir á kortið hjá erlendum ferðamönnum og þar eru til að mynda í boði fjölbreytt afþreying og gisting.
Ef hins vegar eingöngu er litið til flugtíma og fjölda ferða á dag þá er flugáætlunin milli Førde og Óslóar svipuð og í Keflavíkurfluginu frá Akureyri. Ódýrasta farið á norsku leiðinni er á um 19.500 kr. með farangri. Þar vega nokkuð þungt hin nýju komugjöld í Noregi en þau nema um þúsund íslenskum krónum á hvern fluglegg. Þeir sem fljúga innanlands í Noregi borga því tvöfalt hærri komugjöld en þeir sem nýta sér millilandaflug frá norskum flughöfnum.