Strand­sigl­ingar Hurtigruten um Ísland njóta vinsælda

Farþegaskip Hurtigruten hafa verið tíðir gestir í íslenskum höfnum í ár og Ísland verður áfram spennandi áfangastaður fyrir hið norska skipafélag svo lengi sem hægt verður að bjóða farþegunum „ekta og nána upplifun fjarri massatúrisma”.

MS Fram í höfn í Reykjavík. Mynd: Hurtigruten/Sandra Walser

Hið norska Hurtigruten býður ekki aðeins upp á strand­sigl­ingar um norska firði því skip félagsins halda reglu­lega út í heim. Þar á meðal til Íslands og forsvars­menn Hurtigruten sjá tæki­færi í að fjölga ferð­unum hingað til lands. „Áætlun Hurtigruten fyrir Ísland í ár var umsvifa­meiri en nokkru sinni áður. Nýjasta skipið okkar, MS Spits­bergen, sigldi til að mynda við Ísland í samtals einn og hálfan mánuð, þar af þrjár heilar hring­ferðir. Á þessum tíma hafði MS Spits­bergen um 50 viðkomur í hinum ýmsu höfnum á Íslandi áður en skipið hélt svo áfram til Græn­lands og í sigl­ingar um norð­ur­slóðir Kanada. Annað skip, MS Farm, fór einnig nokkrar ferðir til Íslands í sumar,” segir Svein Harald Lian, tals­maður Hurtigruten.

Þessar Íslands­sigl­ingar Hurtigruten hafa notið mikilla vinsælda og segir Svein Harald að siglt hafi verið með „full skip” í allt sumar. „Hjá okkur þýðir það hins vegar að aðeins um 200 manns hafi verið um borð því öfugt við skemmti­ferða­skipin þá eru könn­un­ar­skipin okkar lítil og sérstak­lega hönnuð til að komast sem næst upplif­un­unum, nátt­úr­unni og fólkinu.” Og það eru ekki aðeins Norð­menn sem nýta sér strand­sigl­ingar Hurtigruten um Ísland. „Um borð í leiðöngr­unum okkar er fólk frá hinum ýmsu löndum en blandan er mismun­andi eftir ferðum. Í ár var hlut­fall norskra farþega á bilinu 15–20 prósent,” segir Svein Harald. „Ég held að allir Norð­menn sem heim­sækja Ísland finni fyrir sterkum tengslum við Íslend­inga í ljósi sameig­in­legrar sögu þjóð­anna tveggja”.

Sem fyrr segir hafa Íslands­sigl­ingar Hurtigruten aldrei verið fleiri en þær voru í ár og dagskrá næsta sumars gerir ráð fyrir ennþá fleiri ferðum. „Við höldum áfram að bæta í á næsta ári því þá mun MS Farm fara í tvær 12 daga sigl­ingar hringinn í kringum Ísland og skipið mun einnig, ásamt MS Spits­bergen, fara nokkrar aðrar ferðir yfir sumarið. Prógrammið fyrir árið 2019 er ekki klárt en það sumar tökum við í notkun nýtt skip, MS Roald Amundsen, sem með sína tvinnvél og aðrar tíma­móta­lausnir mun verða umhverf­i­s­væn­asta könn­un­ar­skip heims. Sú stað­reynd skapar okkur og gest­unum ennþá fleiri mögu­leika en það er of snemmt að segja til um hvert MS Roald Amundsen mun sigla. En Ísland er spenn­andi áfanga­staður fyrir Hurtigruten svo lengi sem við getum boðið upp ekta og nána upplifun fjarri massa­t­úr­isma.”

Viðkomu­staðir Hurtigruten í hinni 12 daga ferð Ísland.

Tólf daga sigling með Hurtigruten um Ísland kostar í dag um 540 þúsund krónur á mann og allt fæði er innifalið í verðinu en ekki flug­miði til Íslands þar sem sigl­ingin hefst. Strand­sigling með Hurtigruten er þar með nokkru dýrari kostur en klassísk rútu­ferð um Ísland. Algengt verð á 7 til 10 nátta ferðum um landið er 250 til 400 þúsund en sigling Hurtigruten tekur hins vegar 12 daga.