Fjögur flugfélög buðu upp á reglulegar ferðir héðan til Barcelona síðastliðið sumar og þar af var Icelandair með vikulegar brottfarir. WOW air, Norwegian og Vueling flugu hins vegar þangað tvisvar til fjórum sinnum í viku og í júlí síðastliðnum voru t.d. farnar 41 áætlunarferð frá Keflavíkurflugvelli til El Prat í Barcelona.
Ferðirnar til Madrídar voru helmingi færri, samkvæmt talningu Túrista, en fluginu þangað sinna aðeins Icelandair og Iberia Express. Næsta sumar mun Icelandair hins vegar bæta í Madrídarflugið og leggja niður flugleiðina til Barcelona í staðinn. Guðjón Arngrímsson, talsmaður Icelandair, segir ástæðuna vera þá að félagið sjái tækifæri í auknu flugi til Madrídar og þaðan komi til að mynda fleiri spænskir farþegar en frá Barcelona.
Með þessari breytingu verður Madríd eini áfangastaður Icelandair á Spáni en félagið hætti fyrir fimm árum síðan að bjóða upp á flug til Alicante.
Þess má geta að Norwegian flýgur tvisvar í viku milli Íslands og Madrídar yfir vetrarmánuðina en ekki yfir sumarið.
