Beint á alla leikina á HM í Rússlandi

Á föstudag kemur í ljós í hvaða þremur rússnesku borgum íslenska karlalandsliðið leikur í riðlakeppninni á heimsmeistaramótinu í knattspyrnu í sumar. Hver sem niðurstaðan verður þá munu þotur Icelandair fljúga á staðinn.

icelandair 767 757
Mynd: Icelandair Hotels

Icelandair hefur ákveðið að fljúga að minnsta kosti eitt flug til þeirra þriggja borga í Rússlandi þar sem leikir Íslands í riðlakeppninni fara fram. Ljóst verður 1. desember um hvaða borgir verður að ræða og hverjir leikdagar Íslands verða, en þá verður dregið í riðla keppninnar. Flogið verður frá Íslandi daginn fyrir leik og til baka daginn eftir leik. „Við fáum mikið af fyrirspurnum um HM og ljóst að fjöldi Íslendinga mun gera sér ferð á keppnina. Eflaust munu margir nýta sér áætlunarflug til borga í Evrópu og taka þaðan flug eða lest á áfangastað, en nú liggur fyrir að Icelandair mun fljúga beint á alla þrjá leiki Íslands í riðlakeppninni“, segir Guðjón Arngrímsson, upplýsingafulltrúi Icelandair.

Ef Ísland lendir í C-riðli þá á liðið fyrsta leik í Saransk föstudagskvöldið 16. júní. Þar í borg keppast heimamenn við að koma upp flugvelli fyrir HM og þota Icelandair gæti því orðið eins sú fyrsta til að lenda þar.

Fljótlega að loknum HM-drættinum á föstudag, þegar leikstaðir og leiktímar liggja fyrir, verður flugið auglýst og sett í sölu. Áhugasamir geta skráð sig á HM síðu Icelandair http://www.icelandair.is/sport/hm2018/. Einn heppinn þátttakandi verður dreginn út og fær ferð fyrir tvo til Rússlands með gistingu segir í tilkynningu frá Icelandair.