Í sumarbyrjun hefja bæði íslensku flugfélögin og American Airlines áætlunarflug milli Íslands og Fort-Worth flugvallar í Dallas. Munurinn á fargjöldum félaganna þriggja er hins vegar verulegur og getur verið allt af þrefaldur líkt og Túristi greindi frá. Aðspurð um skýringu á þessu mikla mun þá bendir Martha Thomas, talskona American Airlines, á að félagið bjóði samkeppnishæf fargjöld fyrir þá farþega sem byrja ferðalagið í Dallas. „Við erum bandarískt flugfélag og Bandaríkin eru okkar stærsti markaður,“ bætir Thomas við en segir jafnframt að verðlagning flugfélagsins sé sífellt til endurskoðunar. „Það þýðir að fargjöld breytast reglulega og á hverjum markaði fyrir sig, hvort sem er í Bandaríkjunum eða á Íslandi, getur verðstefnan verið ólík.“
Í því ljósi má nefna að í dag kostar um 135 þúsund krónur að fljúga með American Airlines frá Keflavíkurflugvelli til Dallas dagana 8. til 14. júní. Farið er hins vegar á aðeins 81 þúsund krónur ef flogið er frá Dallas til Íslands. Munurinn er 54 þúsund krónur en til samanburðar kosta ódýrustu farmiðar Icelandair og WOW air rúmlega 60 þúsund á þessum sömu dagsetningum.
Að verðleggja flugmiða með ólíkum hætti eftir mörkuðum er ekki óþekkt í fluggeiranum en var algengara hér á árum áður. En það er ljóst að forsvarsmenn American Airlines, stærsta flugfélags í heimi, eru ekki að horfa til þess að Íslendingar nýti sér áætlunarflug félagsins í sumar. Með verðlagningunni fókus þeir á aðeins á bandaríska ferðamenn á leið til Íslands og svo þá sem gætu haldið áfram frá Keflavíkurflugvelli til Evrópu með samstarfsfélögum American Airlines, þ.e. Finnair, British Airways og Iberia.
