Rútufyrirtækið Airport Direct hefur um nokkurt skeið boðið upp á ferðir frá Keflavíkurflugvelli og að hóteli í litlum hópferðabílum og kallast skutlþjónustan „Premium“. Fargjaldið er í dag 2.990 krónur en hækkar upp í 5.490 krónur þann 1. mars samkvæmt verðskrá á heimasíðu Airport Direct en þann sama dag fær fyrirtækið aðgang að rútustæðunum beint fyrir utan komusal Flugstöðvar Leifs Eiríkssonar. Ástæðan fyrir því er sú að Hópbílar, sem keyptu helmingshlut í Airport Direct í síðasta mánuði, áttu annað af tveimur hæstu tilboðunum í útboði Isavia á aðstöðu fyrir sætaferðir frá flugstöðinni. Airport Direct mun í framhaldinu hefja áætlunarakstur milli höfuðborgarinnar og flugvallarsvæðisins með stórum rútum og á farmiðinn að kosta 2.990 krónur aðra leið.
Það er nokkru hærra fargjald en hefur verið rukkað á þessari leið hingað til líkt og Túristi hefur greint frá. Það vekur einnig athygli að verðið á þessum hefðbundnu sætaferðum, sem kallast „Economy“ á heimasíðu Airport Direct, er það sama og í dag þarf að borga fyrir „Premium“ ferð hjá Airport Direct eins og sjá má á skjámyndunum hér fyrir ofan. Ferðamenn sem kjósa að bæta við skutli upp á hótel þurfa svo að borga aukalega þúsund krónur fyrir það og heildarfargjaldið verður þá 3.990 kr. en ekki 2.990 kr. eins og þess háttar kostar í dag. Túristi hefur leitað svara á þessum verðhækkunum hjá stjórnendum Hópbíla og Airport Direct en ekki fengið nein svör. Ekki heldur við spurningunni um hvort fyrirtækið hyggist nota núverandi aðstöðu á Granda fyrir samgöngumiðstöð eða hvar rúturnar munu stoppa á leið sinni til og frá Keflavíkurflugvelli. Þessar upplýsingar eru ekki á heimasíðu Airport Direct í dag og athygli vekur að hún er aðeins á ensku og engin íslensk útgáfa sjáanleg.
Hópbílar eru í eigu Horns III, sem er sjóður á vegum Landsbréfa, og eru eigendur Horns III lífeyrissjóðir, fagfjárfestar og fjármálafyrirtæki samkvæmt því sem segir á heimasíðu verðbréfafyrirtækisins.
Sem fyrr segir áttu Hópbílar næsthæsta tilboðið í útboði Isavia á stæðunum við komusal Leifsstöðvar og mun fyrirtækið greiða að lágmarki 127 milljónir á ári fyrir aðstöðuna auk sérstakrar leigu á stæðum og miðasölubás. Kynnisferðir, sem áttu hæsta tilboðið, þurfa að greiða árlega nærri 158 milljónir til Isavia og eru þetta umtalsvert hærri álögur en hafa verið á sætaferðunum hingað til. Í kjölfar útboðsins sagði þáverandi forstjóri Kynnisferða, í viðtali við Túrista, að óumflýjanlegt væri að farmiðar Flugrútunnar myndu hækka. Það gekk eftir í haust þegar fargjald Flugrútunnar hækkaði um 200 krónur í 2.700 kr.
Stjórnendur Gray Line sem einnig bjóða upp á sætaferðir frá Keflavíkurflugvelli undir merkjum Airport Express hafa boðað áframhaldandi akstur þrátt fyrir að fyrirtækið missi aðstöðuna beint fyrir utan komusalinn. Í staðinn mun fyrirtækið sinna akstrinum frá rútustæði sem er í framhaldi af skammtímabílastæði fyrir einkabíla og kostar stakt fargjald hjá fyrirtækinu 2.400 kr. Þann 1. mars hefst gjaldtaka á rútustæðinu og mun þá kosta allt að 19.900 krónum að leggja hópferðabifreiðum þar. Þá gjaldtöku hefur Gray Line kært til Samkeppniseftirlitsins.
Líkt og Túristi greindi frá um daginn þá er verð á sætaferðum til og frá Keflavíkurflugvelli nokkru hærra en þekkist frá stærstu flugvöllunum í Ósló og Stokkhólmi en ferðatíminn er álíka langur.
