Samfélagsmiðlar

Þórir ætlar í formanninn og Bjarnheiður íhugar líka framboð

Það gæti farið svo að forsvarsfólk aðildarfélaga Samtaka ferðaþjónustunnar þurfi að kjósa á milli frambjóðenda í embætti formanns samtakanna.

Þórir Garðarsson gefur kost á sér til formanns SAF en Bjarnheiður íhugar framboð.

Undanfarin fjögur ár hefur Grímur Sæmundsen, forstjóri Bláa lónsins, farið fyrir Samtökum ferðaþjónustunnar en hann hyggst ekki bjóða sig fram að nýju líkt og Túristi greindi frá í gær. Í framhaldinu tilkynnti Þórir Garðarsson, forstjóri Gray Line, sem verið hefur varaformaður SAF síðustu þrjú ár,  að hann hafi ákveðið að gefa kost á sér í kjöri til formanns. Í færslu á Facebook segir Þórir að hann hafi mikinn hug á því að vinna áfram að hagsmunamálum atvinnugreinarinnar og að hann hafi í störfum sínum fyrir samtökin í gegnum tíðina fengið hvatningu og þakklæti frá félagsmönnum og það hafi því ekki komið á óvart að margir félagsmenn hafi haft samband við sig í framhaldi af tilkynningu Gríms. „Að vel yfirlögðu ráði hef ég ákveðið að gefa kost á mér í kjöri til formanns SAF, ekki aðeins vegna mikillar hvatningar, heldur ekki síður vegna þess að ég hef mikinn hug á því að vinna áfram að hagsmunamálum þessarar stærstu atvinnugreinar landsins,“ segir Þórir.

Hann bætir því við að það hafi jafnframt haft áhrif á ákvörðun sína að hann telji ekki gott fyrir framvindu viðfangsefna SAF að formaður, varaformaður og framkvæmdastjóri hverfi öll á braut á sama tíma. Vísar Þórir þar til þess að Helga Árnadóttir, sem verið hefur framkvæmdastjóri samtakanna síðustu fjögur ár, tekur í sumarbyrjun við starfi sem framkvæmdastjóri Blue Lagoon Journeys ehf, dótturfélags Bláa Lónsins.

Aðspurður um hvort hann eigi von á fleiri frambjóðendum til formanns þá segir Þórir, í svari til Túrista, að hann geri alveg ráð fyrir því að fleiri gefi kost á sér í kosningu formanns. „Samtök ferðaþjónustunnar eru stór samtök með mikinn fjölda félagsmanna sem margir hverjir eru öflugir og hæfileikaríkir einstaklingar. Nú er það í þeirra höndum að taka ákvörðun um að gefa kost á sér í þetta mikilvæga embætti telji þeir sig geta sinnt verkefninu betur en aðrir.“

Bjarnheiður Hallsdóttir, framkvæmdastjóri og eigandi Katla Travel, staðfestir í svari til Túrista að hún sé alvarlega að að velta því fyrir sér að bjóða sig fram til formanns Samtaka ferðaþjónustunnar. En kosning til stjórnar SAF fer fram á aðalfundi samtakanna þann 21. mars nk. og rennur framboðsfrestur til stjórnar út tveimur vikum fyrr.

Nýtt efni

Mitt inn í dimmum Grünheideskógi skammt frá Berlín hafa 80 manneskjur komið sér fyrir í kofum sem þau hafa byggt hátt uppi trjánum. Kofaþorpið eru bækistöðvar mótmælenda eða aðgerðarsinna eins og þau kalla sig. Einmitt inni í þessum sama skógi hyggst bandaríski rafmagnsbílaframleiðandinn Tesla stækka svokallaða gígaverksmiðju sem var tekin var í notkun í mars …

Lufthansa hefur náð samkomulagi við verkalýðsfélagið Verdi og þar með er endi bundinn á langa vinnudeilu við flugvallarstarfsfólk þýska flugfélagsins. Flugáætlun Lufthansa fer því ekki úr skorðum yfir páskana líkt og útlit var fyrir en félagið er með þrjár flugferðir til Íslands á áætlun sinni yfir hátíðarnar. Hinn nýi samningur Verdi og Lufthansa kemur í …

Það voru 561 þúsund skráðar gistinætur hér á landi í febrúar sem er um 2,5 prósent samdráttur í samanburði sama tímabil í fyrra. Ef tekið er tillit til hlaupársdagsins þá var fækkunin ennþá meiri eða nærri 6 af hundraði. Á hótelum landsins voru gistinæturnar 373 þúsund sem er ögn meira en í febrúar í fyrra …

Þegar Hagstofan leggur mat á breytingar á verðlagi þá er meðal annars horft til fargjalda, bæði í flug innanlands og til útlanda. Samkvæmt nýjum verðmælingum Hagstofunnar þá lækkaði farið frá Keflavíkurflugvelli um 5 prósent í mars en farþegar í innanlandsflugi þurftu að borga 16 prósent meira en í fyrra. Á sama tíma hækkaði verðlag í …

„Undanfarna mánuði hafa stjórnmálamenn og verkalýðsforingjar viðrað hugmyndir um að hækka virðisaukaskattshlutfall ferðaþjónustu í 24%. Almenn greining á grundvelli viðtekinnar þjóðhagfræði, sem SAF hefur látið vinna, bendir til þess að slík hækkun myndi almennt hækka verðlag og þar með verðbólgu á viðkomandi ári, lækka veltu í ferðaþjónustu, veikja samkeppnishæfni hennar, lækka verga landsframleiðslu og auka …

Xiaomi er hraðvaxta hátæknifyrirtæki í Beijing í Kína, stofnað fyrir 14 árum af frumkvöðlinum og milljarðamæringnum Lei Jun og félögum hans. Á síðasta ári var fyrirtækið í þriðja sæti á lista þeirra sem seldu flesta farsímana - næst á eftir Samsung og Apple. Xiaomi framleiðir og selur margskonar annan háþróaðan tæknibúnað og neytendavörur en samdráttur …

Fyrir rúmu ári var greint frá því að þýska Lufthansa-samsteypan hefði áhuga á að kaupa 40 prósenta hlut í ítalska þjóðarflugfélaginu ITA en niðurstaða hefur ekki enn fengist. Í janúar hóf Framkvæmdastjórn Evrópusambandsins rannsókn á samkeppnisáhrifum þess að Þjóðverjarnir eignuðust stóran hlut í ítalska flugfélaginu sem lengi hefur verið stjórnvöldum á Ítalíu höfuðverkur.  Nú í …

Fyrir mánuði sendi Storytel frá sér fréttatilkynningu þar sem kynnt var ný þjónusta fyrir notendur. Brátt eiga hlustendur hljóðbóka möguleika á að velja nýjan lesara ef þeim líkar ekki innlesturinn. Valraddirnar eru allar skapaðar af vélmennum eða svokölluðum gervigreindarupplesurum.  Þetta nýja verkfæri Stoyrtel er tekið í gagnið vegna þess að 89 prósent af þeim sem …