Lán til ferðaþjónustunnar námu tæplega 223 milljörðum króna í lánabókum Arion banka, Íslandsbanka og Landsbankans um síðustu áramót. Höfðu þau hækkað um 33 milljarða frá árinu 2016 samkvæmt þeim upplýsingum sem finna má í ársuppgjörum bankanna þriggja. Vægi lána til ferðaþjónustunnar er langhæst hjá Íslandsbanka eða 13% af útistandandi lánum til viðskiptavina bankans. Hjá Landsbankanum er hlutfallið 8% en 7% hjá Arion banka. Hjá tveimur fyrrnefndu bönkunum var hlutfall lána til ferðaþjónustu óbreytt frá árinu 2016 en hækkaði um 2 prósentustig hjá Arion.
Í milljörðum talið þá er skuld ferðaþjónustunnar 94 milljarðar hjá Íslandsbanka á meðan skuldin við Landsbankanna nemur 75 milljörðum og nærri 54 milljörðum hjá Arion banka. Í heildina voru þetta 223 milljarðar um síðustu áramót en í árslok 2016 var heildarskuldin nærri 191 milljarður. Viðbótin nemur því 32 milljörðum og rúmur helmingur hennar kemur frá Arion banka því þar jukust útlán tengd ferðaþjónustu um 18 milljarða í fyrra. Stærsti hluti þessarar viðbótarlána frá Arion banka fóru í samgöngumál innan ferðaþjónustu því lánveitingar til fyrirtækja í þess háttar rekstri fjórfölduðust í fyrra. Fóru úr 3,6 milljörðum í 14,5 milljarða líkt og Túristi greindi núverið frá nýverið.
Það fást hins vegar ekki nánari upplýsingar frá Arion banka um hvernig þessi lán skiptast á milli greina en samkvæmt atvinnuvegaflokkun Hagstofunnar, sem Arion banki styðst við, þá gætu lánin hafa farið til flugfélaga, bílaleiga, hópferðafyrirtækja auk annars konar fyrirtækja sem tengjast á einhvern hátt samgöngum innan ferðaþjónustu.
Túristi hefur óskað eftir upplýsingum frá bæði Íslandsbanka og Landsbankanum um hvernig lán þeirra til ferðaþjónustunnar skiptast eftir flokkum en í svari Landsbankans segir að ekki sé hætt að veita frekari upplýsingar. Hjá Íslandsbanka munu 55% allra lána til ferðaþjónustu flokkast undir verslun og þjónustu, 21% tilheyrir fasteignafélögum, 18% heyrir undir iðnað og flutning en þau 6% sem eftir standa eru óflokkuð.
