Norska krabbameinsfélagið biðlar nú til forsvarsmanna Norwegian og SAS, tveggja stærstu flugfélaganna þar í landi, um að hætta að sölu á sígarettum sem tollfrjálsum varningi um borð. Tilefni þess að málið komst í hámæli núna er sú staðreynd að hollenska flugfélagið KLM, sem er stórtækt í Noregi, hefur ákveðið að hætta að bjóða tóbak um borð. Í grein norska Dagblaðsins er haft eftir aðalritara krabbameinsfélagsins þar í landi að hún vonist til þess að norsku flugfélögin fylgi fordæmi KLM og annarra norrænna flugfélaga sem hafi hætt þessari sölu. Nefnir hún þar sérstaklega Finnair og Icelandair.
Í frétt Dagblaðsins norska fullyrðir talsmaður SAS að tóbakssalan sé til endurskoðunar en hins vegar segir upplýsingafulltrúi Norwegian að svo lengi sem farþegar sækist eftir þessari vöru þá verði hún á boðstólum.
Sem fyrr segir þá er tóbak ekki til sölu í þotum Icelandair og í svari til Túrista segir Guðjón Arngrímsson, talsmaður félagsins, að þessu hafi verið hætt fyrir allmörgum árum. Svanhvít Friðriksdóttir hjá WOW air segir aðspurð að það hafi verið rætt innan fyrirtæksins að hætta að selja sígarettur um borð en endanlega ákvörðun hafi ekki verið tekin.
Það er aldarfjórðungur liðin frá því að fyrstu reyklausu þotur Icelandair fóru í loftið en það var þann 1. apríl árið 1993. Reykingabannið takmarkaðist þó aðeins við flug félagsins til Norðurlanda og Bretlands og í frétt Morgunblaðsins, þar sem fjallað var um hið nýja reyklausa flug, viðurkennir einn viðmælandi blaðsins að bannið muni hafa áhrif á ferðalög sín. „Ég kem til með að velja flugleiðir þar sem ekki gildir reykbann svo framarlega sem ég næ tengiflugi og ferðatilhögun raskast ekki þeim mun meira. Sem dæmi færi ég frekar til Amsterdam en London fyrst svona er í pottinn búið,“ sagði kona ein í samtali við Morgunblaðið árið 1993. Í grein blaðsins voru svo þessi leiðbeiningar birt fyrir reykingafólk sem var á leið í flug.
Leiðbeiningar til reykingafólks á ferðalögum:
1. Byrjaðu að undirbúa hugann fyrir reyklaust flug nokkrum dögum áð-ur en þú leggur af stað.
2. Þú getur haft með þér fitusnautt og hollt nasl, sem að hluta til kemur í stað tóbaks.
3. Slakaðu á spenntum vöðvum í öxlum og hálsi og andaðu nokkrum sinnum djúpt og rólega.
4.Notaðu hendurnar, t.d. til að ráða krossgátur eða skrifa niður kosti þess að reykja ekki.
5.Stattu upp og teygðu úr þér eins oft og kostur er.
6. Slepptu kaffí og áfengi og drekktu heldur vatn, ávaxtasafa eða mjólk.
7. Verðlaunaðu sjálfa(n) þig eftir reyklaust flug, t.d. með því að fara á góðan veitingastað um kvöldið.
8. Athugaðu möguleikann á að nota reyklaust flug til að hætta loksins að reykja.
9. Það merkilega er að löngun í sígarettu líður hjá fyrr eða síðar. Hvort sem þú reykir hana eða ekki.