Rétt rúmlega 377 þúsund farþegar fóru um flugvelli landsins á fyrri helmingi árs ef Keflavíkurflugvöllur er frátalinn. Þetta er rúmlega 8 þúsund færri farþegar en á sama tímabili í fyrra. Ef litið er til fyrstu sex mánaða áranna á undan þá hefur fjöldinn í ár verið rétt undir meðaltalinu (388 þúsund) á þessari öld. Þó ber að hafa í huga að hinn mikli fjöldi sem nýtti sér innanlandsflugið árin 2000, 2007 og 2008 hífir upp meðaltalið eins og sjá má á súluritinu hér fyrir neðan.
Á fyrri helmingi þessa árs fækkaði farþegum á Reykjavíkurflugvelli um nærri 5 af hundraði en samdrátturinn var minni á Egilsstöðum. Um flugstöðina á Akureyri fóru hins vegar fleiri en á sama tíma í fyrra en horfa verður til þess að 3.525 farþegar flugu milli Akureyrar og Bretlands fyrstu þrjá mánuði ársins samkvæmt tölum frá breskum flugmálayfirvöldum. Um var að ræða leiguflug á vegum breskrar ferðaskrifstofur og þetta voru því ekki farþegar í innanlandsflugi. Þetta var í fyrsta skipti sem þessar ferðir voru í boði og ef ekki hefði komið til þeirra þá hefði þróunin á flugstöðinni á Akureyri verið neikvæð í ár líkt og í Reykjavík og Egilsstöðum. Í tölum Isavia er farþegafjöldinn á öðrum flugvöllum ekki sundurliðaður.
Þar sést til að mynda ekki hversu margir nýttu sér ferðir Ernis til Sauðakróks en tilraun flugfélagsins til að halda úti á áætlunarferðum þangað frá Reykjavík var hætt nú í sumarbyrjun. Verkefnið naut opinberra styrkja líkt og Feykir greindi frá.
Þegar tölur í innanlandsflugi eru skoðaðar verður líka að hafa í huga að Air Iceland Connect hefur frá því í ársbyrjun í fyrra boðið upp á beinar ferðir frá Akureyri til Keflavíkurflugvallar. Sú þjónusta er aðeins í boði fyrir þá sem eru að koma úr eða á leið í millilandaflug og þar er því ekki um að ræða hefðbundið innanlandsflug. Flugfélagið hefur gert hlé á þessum áætlunarferðum í sumar en tekur upp þráðinn í haust.
