Allan ársins hring fljúga þotur Icelandair, SAS og WOW air milli Keflavíkurflugvallar og Kaupmannahafnar. Yfir sumarmánuðina, þegar ferðafjöldinn nær hámarki, eru brottfarirnar héðan til dönsku höfuðborgarinnar að jafnaði rúmlega fimm á dag. Fyrstu sex mánuði þessa árs nýttu 264.213 farþegar sé þessar ferðir milli Íslands og Kaupmannahafnar sem er viðbót um 2 prósent frá sama tíma í fyrra. Þetta kemur fram í tölum Kaupmannahafnarflugvallar. Þess má geta að svona upplýsingar fást ekki hér á landi og hefur Túristi kært þá afstöðu Isavia.
Sem fyrr segir þá ná flugsamgöngurnar héðan til Danmerkur hámarki yfir sumarið og í júní síðastliðnum þá flugu 62.537 farþegar milli Íslands og Kaupmannahafnar. Það er meira en aðra mánuði ársins en engu að síður var samdráttur í farþegafjöldanum í júní upp á 1,3 prósent. Reykjavík eða nánar tiltekið Keflavík var þó inn á topplista danska flugvallarins yfir þær 10 flugleiðir sem flestir nýttu sér í júní síðastliðnum.
Vinsælustu flugleiðirnar til og frá Kaupmannahöfn í júní
- London
- Ósló
- Stokkhólmur
- Helsinki
- Amsterdam
- París
- Álaborg
- Berlín
- Reykjavík
- Frankfurt