Samfélagsmiðlar

Hættur í stjórn WOW air

Ben Baldanza er ekki lengur í stjórn íslenska flugfélagsins en sinnir ráðgjafastörfum fyrir félagið.

Það vakti nokkra athygli þegar Bandaríkjamaðurinn Ben Baldanza tók sæti í stjórn WOW air. Baldanza hefur nefnilega mikla reynslu úr fluggeiranum og var til að mynda forstjóri Spirit flugfélagsins á árunum 2005 til 2016. Stuttu eftir að hann lét af störfum þá settist hann í stjórn WOW air.

Í lok sumars tók Ben Baldanza sæti í stjórn flugfélagsins JetBlue í Boston líkt og Túristi greindi frá. Í fréttatilkynningu frá bandaríska flugfélaginu þann 15. ágúst kom hins vegar hvergi fram að Baldanza væri jafnframt stjórnarmaður í WOW air. Svanhvít Friðriksdóttir, talskona flugfélagsins, staðfesti hins vegar í svari til Túrista að Baldanza væri ennþá í stjórn WOW líkt og hann hefði verið síðustu þrjú ár.

Í samtali við Túrista í dag segir Baldanza hins vegar að hann hafi hætt í stjórn WOW um leið og hann hóf trúnaðarstörf fyrir JetBlue. Þetta hefði verið gert til að forðast hagsmunaárekstra enda væri JetBlue skráð fyrirtæki. Hann segist þó meðvitaður um að hann sé ennþá kynntur sem stjórnarmaður á heimasíðu WOW og líka í úboðsgögnum tengdum skuldabréfaútgáfu WOW.

Því fer þó fjarri að Baldanza hafi sagt slitið við WOW því að hans sögn situr hann ennþá fundi og sinnir ráðgjafastörfum fyrir íslenska flugfélagið enda hafi hann verið eini stjórnarmeðlimurinn með reynslu af flugrekstri. Hann bendir jafnframt á að stjórnarseta í einkafyrirtæki eins og WOW sé á margan hátt öðruvísi en í skráðum félögum.

Aðspurður um niðurstöður skuldabréfaútboðs WOW air þá segir Baldanza það jákvætt að fá inn aukið fé í fyrirtækið því flugrekstur sé í eðli sínu fjárfrekur og WOW sé í mikilvægum stækkunarfasa. Hann viðurkennir þó að það hafi ekki verið nógu gott að útboðskynningin hafi verið gerð opinber eins og raun bar vitni. Bendir hann til að mynda á að nú þekki stjórnendur Icelandair betur til rekstrar WOW en áður.

Morgunblaðið sagði frá því í morgun að samkvæmt heimildum blaðsins þá skuldar WOW air Isavia lendingagjöld upp á allt að 2 milljarða króna. Baldanza staðfestir að hann þekki til skuldar við Keflavíkurflugvöll en að hann hafi ekki vitað af fréttaflutningi um málið. Þess má jafnframt geta að varaformaður stjórnar Isavia, Matthías Imsland, er einn af stofnendum WOW air og var hluti af eigandahópi flugfélagsins í upphafi.

Nýtt efni

Mitt inn í dimmum Grünheideskógi skammt frá Berlín hafa 80 manneskjur komið sér fyrir í kofum sem þau hafa byggt hátt uppi trjánum. Kofaþorpið eru bækistöðvar mótmælenda eða aðgerðarsinna eins og þau kalla sig. Einmitt inni í þessum sama skógi hyggst bandaríski rafmagnsbílaframleiðandinn Tesla stækka svokallaða gígaverksmiðju sem var tekin var í notkun í mars …

Lufthansa hefur náð samkomulagi við verkalýðsfélagið Verdi og þar með er endi bundinn á langa vinnudeilu við flugvallarstarfsfólk þýska flugfélagsins. Flugáætlun Lufthansa fer því ekki úr skorðum yfir páskana líkt og útlit var fyrir en félagið er með þrjár flugferðir til Íslands á áætlun sinni yfir hátíðarnar. Hinn nýi samningur Verdi og Lufthansa kemur í …

Það voru 561 þúsund skráðar gistinætur hér á landi í febrúar sem er um 2,5 prósent samdráttur í samanburði sama tímabil í fyrra. Ef tekið er tillit til hlaupársdagsins þá var fækkunin ennþá meiri eða nærri 6 af hundraði. Á hótelum landsins voru gistinæturnar 373 þúsund sem er ögn meira en í febrúar í fyrra …

Þegar Hagstofan leggur mat á breytingar á verðlagi þá er meðal annars horft til fargjalda, bæði í flug innanlands og til útlanda. Samkvæmt nýjum verðmælingum Hagstofunnar þá lækkaði farið frá Keflavíkurflugvelli um 5 prósent í mars en farþegar í innanlandsflugi þurftu að borga 16 prósent meira en í fyrra. Á sama tíma hækkaði verðlag í …

„Undanfarna mánuði hafa stjórnmálamenn og verkalýðsforingjar viðrað hugmyndir um að hækka virðisaukaskattshlutfall ferðaþjónustu í 24%. Almenn greining á grundvelli viðtekinnar þjóðhagfræði, sem SAF hefur látið vinna, bendir til þess að slík hækkun myndi almennt hækka verðlag og þar með verðbólgu á viðkomandi ári, lækka veltu í ferðaþjónustu, veikja samkeppnishæfni hennar, lækka verga landsframleiðslu og auka …

Xiaomi er hraðvaxta hátæknifyrirtæki í Beijing í Kína, stofnað fyrir 14 árum af frumkvöðlinum og milljarðamæringnum Lei Jun og félögum hans. Á síðasta ári var fyrirtækið í þriðja sæti á lista þeirra sem seldu flesta farsímana - næst á eftir Samsung og Apple. Xiaomi framleiðir og selur margskonar annan háþróaðan tæknibúnað og neytendavörur en samdráttur …

Fyrir rúmu ári var greint frá því að þýska Lufthansa-samsteypan hefði áhuga á að kaupa 40 prósenta hlut í ítalska þjóðarflugfélaginu ITA en niðurstaða hefur ekki enn fengist. Í janúar hóf Framkvæmdastjórn Evrópusambandsins rannsókn á samkeppnisáhrifum þess að Þjóðverjarnir eignuðust stóran hlut í ítalska flugfélaginu sem lengi hefur verið stjórnvöldum á Ítalíu höfuðverkur.  Nú í …

Fyrir mánuði sendi Storytel frá sér fréttatilkynningu þar sem kynnt var ný þjónusta fyrir notendur. Brátt eiga hlustendur hljóðbóka möguleika á að velja nýjan lesara ef þeim líkar ekki innlesturinn. Valraddirnar eru allar skapaðar af vélmennum eða svokölluðum gervigreindarupplesurum.  Þetta nýja verkfæri Stoyrtel er tekið í gagnið vegna þess að 89 prósent af þeim sem …