Óljós tíðindi af gangi mála hjá WOW

Fyrir helgi sagði Skúli Mogensen, forstjóri og eini eigandi WOW air, að hann væri kominn með vilyrði fyrir kaupum á skuldabréfum upp á 5,5 milljarði. Í gærkvöld segir Vísir hins vegar að útgáfan muni nema 13 milljörðum. Sögusagnir eru í gangi um þrýsting á þátttöku íslenskra aðila.

Mynd: WOW air

„Skúli tryggt sér milljarða króna,” sagði í fyrirsögn á forsíðu Fréttablaðsins föstudaginn 31. ágúst og var þar vísað til þátttöku í yfirstandandi skuldabréfaútgáfu flugfélagsins. Ekki kom fram í fréttinni, sem birtist líka á Vísi, hversu margir milljarðarnir væru eða hvort upphæðin væri nógu há til að lágmarks þátttöku í útboðinu væri náð. Það sagði þó í greininni að stefnt væri að því að útboðinu myndi ljúka innan tveggja vikna. Upphaflega stóð til að safna 6 til 12 milljörðum króna líkt og áður hefur komið fram.

Í fyrradag varpaði Skúli Mogensen, forstjóri og eini eigandi WOW air, ljósi á gang mála í viðtali við fréttaveituna Bloomberg. Þar sagði hann að safnast myndi að lágmarki 50 milljónir dollarar (um 5,5 milljarðar króna) og að tilkynnt yrði um niðurstöðuna öðru hvoru megin við helgina.

Engin tilkynning barst frá WOW air fyrir helgi en í gærkvöld birti Vísir frétt þar sem fram kemur að WOW stefni að útgáfu skuldabréfa upp á 13 milljarða. Hvort komnir eru kaupendur að þessum bréfum kemur hvergi fram og einnig er ekki fjallað um misræmið í þessum upplýsingum og því sem Skúli hafði sjálfur sagt daginn áður. Í frétt Vísis segir líka að WOW stefni á skráningu í kauphöllinni í Frankfurt en í fyrrnefndu viðtalið við Bloomberg segir Skúli að hann horfi til skráningar í Skandinavíu. Ekkert er minnst á Frankfurt í viðtali Bloomberg en heimildir Vísis eru skilmálar í útboðsgögnum norska verðbréfafyrirtækisins Pareto.

Ástæðan fyrir ósamræminu skrifast því líklega á svör Skúla við spurningum Bloomberg og hins vegar útboðslýsinguna. Það ber líka að hafa í huga að það er grundvallarmunur á því að gefa út skuldabréf  og að hafa selt þau. Mismunurinn á áætlaðri útgáfu og þeirri upphæð sem Skúli segist hafa fengið vilyrði fyrir er í dag um 6 til 7 milljarðar. Og nú eru uppi sögusagnir um að hart sé lagt að íslenskum fjármálastofnunum að brúa bilið. Ekki eingöngu til að ljúka fjármögnun flugfélagsins heldur mun það líka vera krafa hjá erlendum aðilum að íslenskir fjárfestar, þ.e heimamenn sjálfir, sýni traust sitt á WOW air með taka þátt í útboðinu. „Fjármálaráðherra hefur enga vitneskju um það hvort ríkisbankar ætli að taka þátt og hefur enga aðkomu að slíkum ákvörðunum eins og lög gera ráð fyrir,” segir í svari Svanhildar Hólm Valsdóttur, aðstoðarkonu Bjarna Benediktssonar fjármálaráðaherra, við fyrirspurn Túrista um meinta aðkomu ríkisbanka að skuldabréfakaupum í WOW air.

Talsmenn stærstu banka landsins vilja heldur ekki láta hafa neitt eftir sér um málið og ekki hefur fengist svar frá Skúla sjálfum nú í morgun. Þess má geta að ársreikningur WOW fyrir árið 2017 hefur ennþá ekki verið birtur þó frestur til þess sé liðinn.