Fyrsta íslenska hótelið vottað af Green Globe

Hótel Eyja er komin í flokk með hinum Guldsmeden hótelunum sem öll hafa uppfyllt kröfur Green Globe sem snúa að umhverfisvernd og samfélagsmálum.

Eitt af hinum 65 herbergjum á Hótel Eyju. MYND: HÓTEL EYJA GULDSMEDEN

Við Brautarholt í Reykjavík er Hótel Eyja til húsa og er það rekið í anda dönsku hótelkeðjunnar Guldsmeden þar sem lögð er áhersla á sjálfbærni og umhverfismál.  Gististaðir Guldsmeden í Kaupmannahöfn, Árósum og Ósló hafa allir fengið vottun umhverfissamtakanna Green Globe og nýverið bættist Hótel Eyja í þann hóp.

Í tilkynningu segir að tekist hafi að draga úr kolefnisfótspori hótelsins og koma á fót viðvarandi markmiðum hvað varðar náttúruvernd og samfélagslegan stuðning. Einnig að sýna fram á nýsköpun sem aukið hefur þjónustu og þæginda gesta og starfsfólks. „Ég trúi því fastlega að það sé á okkar ábyrgð að styðja við og vernda samfélag okkar og náttúru. Við notumst við sjálfbæra viðskiptahætti sem hafa góð áhrif á samfélagið og umhverfið en skila sér líka út í hagkerfið,“ segir Linda Jóhannsdóttir sem rekur hótelið ásamt eiginmanni sínum Ellerti Finnbogasyni. „Margir hótelgestir kjósa frekar að gista á „grænum“ hótelum, þar sem þá geta þeir verið vissir um að þeir séu að leggja sitt af mörkum til að vernda umhverfið. Um 87% ferðamanna segja að vistvænar starfsvenjur séu mikilvægur þáttur í vali þeirra á gistiplássum og ferðamáta skv. Nýlegri könnun Booking.com sem er mikill vöxtur frá fyrri könnunum. Umhverfis viðurkenningar á borð við Green Globe gera okkur kleift að beina þessum umhverfismeðvituðu gestum í átt að hótelinu okkar,“ bætir Linda við.

Sendlahjól og vistvænir birgjar

Á Hótel Eyju er lögð áhersla á vistvæna ábyrgð og lífræna fæðu úr nærumhverfinu. „Hráefnin sem við notumst við koma að mestu leyti úr nærumhverfi okkar, og eru send einu sinni í viku með bíl eða reiðhjóli til að draga úr kolefnisspori hótelsins. Við höfum yfir að ráða sendlahjóli sem er nýtt fyrir minni verslunarferðir, svo sem þegar þarf að kaupa brauð eða sætabrauð—sem allt er framleitt á lífrænan máta. Við kaupum nánast eingöngu frá viðurkenndum vistvænum birgjum sem beita sanngjörnum viðskiptaháttum, og kjósum heldur að draga úr þjónustu en að brjóta í bága við stefnur okkar. Frekar en að nota bíl þá hvetjum gesti til að ganga eða nýta sér hótelhjólin sem við bjóðum upp á, en það gefur þeim færi á að anda að sér hreinu og fersku íslensku lofti. Að sjálfsögðu skal líka allt drykkjarvatn koma beint úr krananum, þar sem Ísland býður upp á einstaklega hreint og tært vatn sem hægt er að drekka um allt land að kostnaðarlausu,“ segir Linda.

Áformað er að opna annað 52 her­bergja hót­el á Lauga­vegi 55, Von Guldsmeden næsta sum­ar. Þar verða þrjú versl­un­ar­rými á jarðhæð og veit­inga­hús í kjall­ara. Hjón­in Linda Jó­hanns­dótt­ir og Ell­ert Finn­boga­son munu eiga og reka hót­elið sem verður und­ir merkj­um dönsku keðjunn­ar Gulds­meden og rekið á sömu gildum.