Primera air skilur eftir sig tugmilljóna skuld á Keflavíkurflugvelli

Ógreidd lendinga- og farþegagjöld flugfélags Andra Más Ingólfssonar nema að öllum líkum háum upphæðum. Félagið var þó umsvifalítið í millilandaflugi héðan.

Þó Primera air hafi aðeins staðið undir um einni af hverjum hundrað brottförum frá Keflavíkurflugvelli þá voru ferðirnar félagsins hingað engu að síður ein til tvær á dag yfir sumarmánuðina. Í nýliðnum september lentu Boeing þotur félagsins 33 sinnum á Keflavíkurflugvelli og í ágúst voru lendingarnar 45 talsins samkvæmt daglegum talningum Túrista á flugumferð.

Nú er Primera air komið í greiðslustöðvun og þotur félagsins komnar á jörðina. Fjöldi farþega félagsins hefur síðustu sólarhringa þurft að koma sér heim á eigin kostnað og þeir sem eiga ónýtta miða þurfa að sækja um endurgreiðslur í gegnum banka- og greiðslukortafyrirtæki. Þrot félagsins veldur því mörgum einstaklingum og fyrirtækjum tjóni og gera má ráð fyrir að ógreidd skuld Primera air við Keflavíkurflugvöll nemi mörgum tugum milljóna.

Lendingagjöld flugfélagsins fyrir september námu til að mynda um 4 milljónum samkvæmt útreikningum Túrista og farþegagjöldin hafa verið um 17 milljónir ef reiknað er með eðlilegri sætanýtingu yfir sumarmánuðina. Samtals rúm 21 milljón og þar sem reikningurinn fyrir síðasta mánuð hefur líklega fyrst verið gefin út daginn sem Primera air fór í þrot þá er hann næsta víst ógreiddur. Greiðslufresturinn hjá Isavia mun að jafnaði vera um 2 mánuðir og reikningur fyrir ágúst því sennilega líka ógreiddur í bókum Primera air. Þann mánuð voru umsvif Primera air nokkru meiri og skuldin fyrir nærri 30 milljónir miðað við fyrrnefndar forsendur.

Ekki fást upplýsingar hjá Isavia um hver skuld Primera air er við Keflavíkurflugvöll en miðað við tölunar hér að ofan þá hafa vanskilin numið að minnsta kosti 50 milljónum króna ef reikningar fyrir september og ágúst hafi verið ógreiddir. Ef skuldahalinn nær aftur til júnímánaðar þá er upphæðin um tvöfalt hærri.

Sem fyrr segir þá stóð flugfélag Andra Más Ingólfssonar undir sáralitlum hluta af flugumferðinni til og frá Keflavíkurflugvelli. Til samanburðar þá má gera ráð fyrir að reikningurinn sem Isavia sendi Icelandair fyrir september mánuð hafi numið á bilinu 550 til 650 milljónum króna. WOW air hefur miðað við sömu forsendur fengið reikning upp á 450 til 550 milljónir króna. Hafa ber í huga að útreikningar á gjöldum þessara tveggja flugfélaga er flóknari þar sem hlutfall skiptifarþega hefur mikið að segja og eins sú staðreynd að flugfélögin notast við ólíkar gerðir flugvéla.

Leiðrétt: Í upphaflegri útgáfu fréttarinnar var því haldið fram að farþegagjöldin væru opinber gjöld. Hið rétta er svo er ekki. Þetta eru, líkt og lendingagjöldin, tekjur flugvallarins, þ.e. Isavia.