Að sofa í fólksbíl yfir köldustu mánuði ársins hefur lengi verið tengt við vosbúð og síðastliðinn vetur bárust fréttir af erfiðri vist þeirra Íslendinga sem áttu engan annan kost en að gista á tjaldstæðum landsins. Á sama tíma bauðst ferðafólki hér á landi hins vegar að leigja sér tjöld eða fólksbíla með dýnum í skottinu líkt og Túristi greindi frá. Þess háttar er einnig í boði nú í vetur og úrvalið er töluvert á vefsíðu Airbnb. Þar á meðal er að finna fólksbíl af tegundinni Subaru Forester á vegum fyrirtækisins Black Sheep Campers og kostar sólarhringurinn um 11 þúsund krónur. Er tekið fram í auglýsingunni að í bílnum sé nægt svefnpláss fyrir tvo fullorðna og eitt barn. Fyrirtækið auglýsir líka Ford jeppling og kostar hann 25 þúsund krónur á sólarhring.

Stefán Sigfússon hjá Black Sheep Campers, staðfestir í svari til Túrista, að bílarnir séu í raun leigðir út yfir vetrarmánuðina og þeim fylgi hitari. Við þetta bætir kollegi hans, Þorkell Þorkelsson, að þeir séu í raun aðeins að prófa sig áfram með þetta. „Það fylgja hlýjar sængur og hitari, sem verður að tengjast rafmagni á tjaldsvæði, ásamt öðru með okkar bílum. [V]ið erum aðeins að prufa þetta með tvo bíla til að sjá hvernig gengur. Við sendum okkar viðskiptavinum mjög greinar góðar upplýsingar um allar hættur sem geta stafað af vetrarakstri á Íslandi ásamt því að fara mjög vel yfir hvað skal varast. Þetta hefur gengið mjög vel og okkar viðskiptavinir hafa verið virkilega ánægðir sem af er vetri.“

Fyrirtæki sem leigja út svefnpláss í bílum þurfa ekki að vera með gistileyfi heldur aðeins bílaleiguleyfi frá Samgöngustofu. Sýslumaður gefur hins vegar út gistileyfin. Pétur Snæbjörnsson, framkvæmdastjóri Fyrirtækja í hótel- og gistiþjónustu, fullyrðir að engar reglur né eftirlit sé með starfsemi sem þessari. „Gjarnan eru keyptir í þetta sendibílar, sem eru lægri tollflokki, og þeim síðan breytt. Þeir eru svo leigðir út jafnvel sem sendibílar en ekki bílalaeigubílar eða húsbílar. Enginn fylgist með þessu,“ segir Pétur. Hann segir líka dæmi um að keyptir séu gamlir bílar og lítið breyttir og það sé síst skárra. „Enginn veit hve margir svona bílar eru í umferð eða til leigu eða hvert umfang starfsemi af þessu tagi er á markaði. Þeim hefur fjölgað hratt undanfarin ár sem er áhugavert.“ Pétur spyr sig líka hvað það sé í markaðssetningu Íslands sem hvetji til eftirspurnar eftir þessari gistingu og hvernig ferðamönnum detti í hug að koma hingað að vetri til og kaupa svona þjónustu. „Kaupendur eru jafnvel hvattir til að nýta ekki þjónustu tjaldstæða. Samkvæmt tölum Hagstofunnar gistu 1.000 manns á hverri nóttu í svona ökutækjum utan þjónustusvæða og borga þar með ekki gistináttaskatt,“ bætir Pétur við.

Þess má geta að framboð á næturgistingu í fólksbílum á vef Airbnb er miklu meira hér á landi en á hinum Norðurlöndunum. Sá sem kýs þennan gistikost hefur aðeins úr fjórum hjólhýsum að velja í Helsinki yfir jólin og í Ósló finnur Airbnb einn bíl með dýnum og fjögur hjólhýsi. Í Reykjavík eru í dag laus gisting í 41 fólks- eða húsbíl frá 23. til 26. desember.