Lengi vel komust Íslendingar aðeins til Kanarí og Tenerife yfir vetrarmánuðina og einungis ef þeir keyptu pakkaferð hjá ferðaskrifstofu. Með tilkomu áætlunarflugs WOW air til Tenerife og síðar Las Palmas á Kanarí þá fjölgaði valkostunum og síðustu ár hefur íslenskum ferðamönnum á spænsku eyjunum fjölgað verulega. Þannig tvöfaldaðist fjöldi íslenskra túrista á Tenerife á árunum 2014 til 2016 og samkvæmt nýjum tölum ferðamálaráðs Spánar þá heimsóttu 27.666 Íslendingar Kanaríeyjar á fyrri helmingi ársins. Það jafngildir því að um þúsund Íslendingar hafi í viku hverri heimsótt eyjaklasann og er það ríflega tvöföldun frá sama tíma í fyrra.
Á fyrri helmingi ársins flugu í heildina 333 þúsund Íslendingar til útlanda frá Keflavíkurflugvelli og miðað við tölur ferðamálaráðs Spánar þá hefur tólfti hver Íslendingur í Leifsstöð verið á leiðinni til Kanarí eða Tenerife.
Langar þig til Tenerife: Taktu þá þátt í ferðaleik Ferðamálaráð Spánar