Það er ennþá óljóst hvort bandaríska fjárfestingafélagið Indigo Partners muni fjárfesta í WOW air. Ekki liggur þá fyrir hvort félagið eignist meirihluta í flugfélaginu eða ekki. Í Morgunblaðinu í dag er þó fullyrt að íslensk flugrekstrarleyfi sé bundið því skilyrði að um íslenskt eignarhald sé að ræða. Er þar vísað til ákvæða í reglugerð Evrópuþingsins og Evrópuráðsins.
Þessi ströngu skilyrði sem Morgunblaðið vísar í eru athyglisverð í ljósi þess að Primera Air, flugfélag Andra Más Ingólfssonar, var með flugrekstrarleyfi í Danmörku og Lettlandi. Jafnvel þó flugfélögin væru alfarið í hans eigu og tilheyrðu íslensku móðurfélagi. Íslenskir aðilar áttu líka Sterling flugfélagið í Danmörku.
Gera má ráð fyrir Danir og Lettar mættu að sama skapi eiga meirihluta í íslenskum flugfélögum. Hins vegar gæti málið snúið öðruvísi við ef um væri að ræða bandarískan aðila eins og Indigo Partners. Meirihlutaeign í íslenskum flugrekanda er því mögulega bundin við EES-svæðið en ekki eingöngu Ísland. Túristi óskaði eftir skýringum frá Samgöngustofu á hvernig reglurnar eru í raun og í svari segir að evrópskt eignarhald þurfi til, ekki fortakslaust íslenskt eins og haldið var fram í Morgunblaðinu.
