Samfélagsmiðlar

Misheppnað hliðarskref Icelandair í Washington

Þeim fækkaði þónokkuð sem nýttu sér áætlunarflug Icelandair til og frá Washington borg þrátt fyrir að félagið hafi flogið þaðan frá tveimur flugvöllum og fjölgað ferðum.

washington hvitahusið David Everett Strickler

Frá Washington DC.

Í kringum höfuðborg Bandaríkjanna er að finna þrjár alþjóðlegar flughafnir og ein af þeim er Baltimore/Washington flugvöllur. Þangað flugu þotur Icelandair um langt árabil en í tengslum við endurskipulagningu félagsins í kringum íslenska efnahagshrunið voru áætlunarferðirnar til Baltimore lagðar niður. Vorið 2011 tók Icelandair upp þráðinn að nýju í Washington en þá með reglulegu flugi til Washington Dulles flugvallar. Ferðalagið þangað, frá miðbæ Washington, er álíka langt og til Baltimore flugvallar.

Stjórnendur WOW air völdu aftur á móti Baltimore sem sína heimahöfn á bandaríska höfuðborgarsvæðinu þegar félagið hóf Ameríkuflug sumarið 2015. Síðan þá hafa bæði flugfélögin aukið umsvif sín verulega í farþegaflugi til og frá Washington svæðinu, Icelandair frá Dulles og WOW frá Baltimore. Í ársbyrjun í fyrra boðaði Icelandair óvænt endurkomu sína til Baltimore. Jómfrúarferðin var farin í lok maí og hélt félagið úti ferðunum þangað fram á haustið samhliða fluginu til Dulles. Í heildina fjölgaði flugferðum Icelandair um nærri 10 af hundraði til Washington svæðisins síðastliðið sumar samkvæmt talningum Túrista.

Icelandair snýr hins vegar ekki aftur til Baltimore fyrir næstu sumarvertíð. Ástæðan er sú að afkoman af fluginu var ekki nógu góð samkvæmt svari félagsins við fyrirspurn Túrista.

Þessi ákvörðun þarf ekki að koma á óvart þegar rýnt er í tölur bandarískra flugmálayfirvalda. Þá kemur í ljós að frá júní og fram í september í fyrra þá fækkaði farþegum Icelandair, til og frá Washington svæðinu, um ríflega fjögur þúsund eða um 5 af hundraði. Þetta gerðist þrátt fyrir að Icelandair hafi flogið frá tveimur flugvöllum og samtals fjölgað ferðum um nærri níu af hundraði samkvæmt talningu Túrista.

Varlega áætlað má gera ráð fyrir að tekjutap Icelandair af þessum samdrætti í Washington nemi að minnsta kosti rúmlega eitt hundrað milljónum króna yfir þetta fjögurra mánaða tímabil. Það er þó erfitt að leggja nákvæmt mat á tekjumissinn þar sem leiðakerfi Icelandair byggir að miklu leyti á tengiflugi. Verðlagning á stökum fluglegg, í tengiflugi milli Bandaríkjanna og Evrópu, er til að mynda önnur en á áætlunarferð frá Íslandi til Washington.

Það voru hins vegar 43 prósent fleiri sem nýttu sér áætlunarferðir WOW í Baltimore á þessu fjögurra mánaða tímabili. Viðbótin er þó  hlutfallslega minni en varð í fjölda flugferða því WOW bætti verulega í flugið til Baltimore í fyrra. Í stað einnar ferðar á dag voru brottfarirnar tvær suma daga og í heildina fjölgaði áætlunarferðum WOW til bandaríska flugvallarins um nærri sextíu af hundraði samkvæmt talningum Túrista.

Þess má geta að íslensk flugmálayfirvöld veita ekki upplýsingar um farþegafjölda í áætlunarflugi öfugt við það sem tíðkast í Bandaríkjunum. Túristi kærði þennan upplýsingaskort til úrskurðarnefndar upplýsingamála síðastliðið vor en niðurstaða hefur ekki ennþá fengist.

Baltimore/Washington var ekki eini áfangastaðurinn sem Icelandair elti WOW air til í fyrra. Félagið hóf líka samkeppni við keppinautinn í Dublin og San Francisco og Berlín stuttu áður. WOW air skoraði svo Icelandair á hólm í Vancouver og Orlando. Jómfrúarferðin til þeirrar fyrrnefndu verður þó aldrei farin og Orlandóflugið var skammlíft.

Nýtt efni

Mitt inn í dimmum Grünheideskógi skammt frá Berlín hafa 80 manneskjur komið sér fyrir í kofum sem þau hafa byggt hátt uppi trjánum. Kofaþorpið eru bækistöðvar mótmælenda eða aðgerðarsinna eins og þau kalla sig. Einmitt inni í þessum sama skógi hyggst bandaríski rafmagnsbílaframleiðandinn Tesla stækka svokallaða gígaverksmiðju sem var tekin var í notkun í mars …

Lufthansa hefur náð samkomulagi við verkalýðsfélagið Verdi og þar með er endi bundinn á langa vinnudeilu við flugvallarstarfsfólk þýska flugfélagsins. Flugáætlun Lufthansa fer því ekki úr skorðum yfir páskana líkt og útlit var fyrir en félagið er með þrjár flugferðir til Íslands á áætlun sinni yfir hátíðarnar. Hinn nýi samningur Verdi og Lufthansa kemur í …

Það voru 561 þúsund skráðar gistinætur hér á landi í febrúar sem er um 2,5 prósent samdráttur í samanburði sama tímabil í fyrra. Ef tekið er tillit til hlaupársdagsins þá var fækkunin ennþá meiri eða nærri 6 af hundraði. Á hótelum landsins voru gistinæturnar 373 þúsund sem er ögn meira en í febrúar í fyrra …

Þegar Hagstofan leggur mat á breytingar á verðlagi þá er meðal annars horft til fargjalda, bæði í flug innanlands og til útlanda. Samkvæmt nýjum verðmælingum Hagstofunnar þá lækkaði farið frá Keflavíkurflugvelli um 5 prósent í mars en farþegar í innanlandsflugi þurftu að borga 16 prósent meira en í fyrra. Á sama tíma hækkaði verðlag í …

„Undanfarna mánuði hafa stjórnmálamenn og verkalýðsforingjar viðrað hugmyndir um að hækka virðisaukaskattshlutfall ferðaþjónustu í 24%. Almenn greining á grundvelli viðtekinnar þjóðhagfræði, sem SAF hefur látið vinna, bendir til þess að slík hækkun myndi almennt hækka verðlag og þar með verðbólgu á viðkomandi ári, lækka veltu í ferðaþjónustu, veikja samkeppnishæfni hennar, lækka verga landsframleiðslu og auka …

Xiaomi er hraðvaxta hátæknifyrirtæki í Beijing í Kína, stofnað fyrir 14 árum af frumkvöðlinum og milljarðamæringnum Lei Jun og félögum hans. Á síðasta ári var fyrirtækið í þriðja sæti á lista þeirra sem seldu flesta farsímana - næst á eftir Samsung og Apple. Xiaomi framleiðir og selur margskonar annan háþróaðan tæknibúnað og neytendavörur en samdráttur …

Fyrir rúmu ári var greint frá því að þýska Lufthansa-samsteypan hefði áhuga á að kaupa 40 prósenta hlut í ítalska þjóðarflugfélaginu ITA en niðurstaða hefur ekki enn fengist. Í janúar hóf Framkvæmdastjórn Evrópusambandsins rannsókn á samkeppnisáhrifum þess að Þjóðverjarnir eignuðust stóran hlut í ítalska flugfélaginu sem lengi hefur verið stjórnvöldum á Ítalíu höfuðverkur.  Nú í …

Fyrir mánuði sendi Storytel frá sér fréttatilkynningu þar sem kynnt var ný þjónusta fyrir notendur. Brátt eiga hlustendur hljóðbóka möguleika á að velja nýjan lesara ef þeim líkar ekki innlesturinn. Valraddirnar eru allar skapaðar af vélmennum eða svokölluðum gervigreindarupplesurum.  Þetta nýja verkfæri Stoyrtel er tekið í gagnið vegna þess að 89 prósent af þeim sem …