Ef ferðinni er heitið til Bretlands þá eru valkostirnir margir. Frá Keflavíkurflugvelli er núna flogið beint til níu breskra flugvalla og áætlunarferðirnar til London hafa verið allt að tólf á dag. Bresku áfangastöðum íslensku flugfélagaanna hefur þó fækkað síðustu misseri. Nú flýgur Icelandair ekki lengur til Birmingham og Bombardier flugvélar Air Iceland Connect eru hættar að sjást við flugstöðvarnar í Aberdeen og Belfast. Á sama tíma hefur WOW lagt niður áætlunarflug sitt til Bristol og félagið gerði líka vetrarhlé á ferðunum til Edinborgar. Við þetta bætist að Norwegian flýgur ekki lengur frá Gatwick og brátt færast umsvif WOW frá þessum næststærsta flugvelli Bretland og yfir á Stansted.
Þrátt fyrir þennan samdrátt þá nýttu nærri þrjú prósent fleiri farþegar sér flug milli Íslands og Bretlands í fyrra en árið 2017. Í heildina voru farþegarnir rúmlega ein og hálf milljón eða 4620 á degi hverjum. Hafa ber í huga að farþegar eru tvítaldir, bæði þegar þeir lenda í Bretlandi og líka þegar þeir fljúga þaðan.
Eins og gefur að skilja þá er stór hluti þessara farþega á leið með íslensku flugfélögunum milli Bretlands og N-Ameríku. Og eins og hefur komið fram í viðtölum Túrista við forsvarsmenn British Airways þá hafa kínverskir ferðamenn verið stór hluti af þeim sem nýta sér ferðir þess félags frá London.
Eins og sjá má á töflunni hér fyrir neðan þá varð nokkur samdráttur í nóvember og desember en núgildandi vetraráætlun hófst í lok október síðastliðinn. Það er því líklegt að farþegafjöldinn hafi farið lækkandi áfram í janúar og febrúar. Páskarnir skýra svo sveiflurnar í mars og apríl.
Auk áætlunarferða til Keflavíkurflugvallar þá er einnig í boði leiguflug frá Bretlandseyjum til bæði Keflavíkurflugvallar og Akureyrar. Þeir farþegar eru ekki meðtaldir í tölunum hér að neðan. Upplýsingar eru fengnar frá breskum flugmálayfirvöldum en sambærilegar upplýsingar eru ekki opinberar hér á landi og kærði Túristi á afstöðu Isavia til úrskurðarnefndar upplýsingamála síðastliðið vor. Málið hefur ekki ennþá verið tekið fyrir.
