Það liðu aðeins nokkrir klukkutímar frá því að Alþingi samþykkti tillögu að nýrri samgönguáætlun og þangað til að stjórnendur Icelandair Group boðuðu endurskoðun á starfsemi Air Iceland Connect. Ástæðan er sú að afkoma fyrirtækisins er mun verri en áður en Air Iceland Connect er umsvifamesti flugrekandinn á innanlandsmarkaði.
Sá næststærsti er Flugfélagið Ernir og þar er staðan líka þung. Í ársbyrjun kyrrsetti Isavia til að mynda stærstu flugvél fyrirtækisins vegna vangoldina þjónustugjalda upp á 98 milljónir króna. Það var fyrst nú í fyrradag sem samkomulag tókst á milli Isavia og Ernis um skuldina og var kyrrsetningunni aflétt í kjölfarið.
Á sama tíma og rekstur Air Iceland Connect og Ernis hefur þyngst þá hefur farþegum í innanlandsflugi fækkað. Þannig fóru um 30 þúsund færri farþegar um aðra flugstöðvar landsins en Keflavíkurflugvöll í fyrra og nemur samdrátturinn um fjórum af hundraði.
