„Samkeppnisaðilar hafa fengið að safna upp skuldum á Keflavíkurflugvelli sem skekkir verulega samkeppnisstöðu á markaði,“ sagði Bogi Nils Bogason, forstjóri Icelandair Group, á aðalfundi flugfélagsins á föstudag samkvæmt frétt Mbl.is. Dylst engum að þar er forstjórinn að vísa til meintrar skuldar WOW air á lendinga- og farþegagjöldum. Það er ekki opinbert hversu há hún er en Bogi ætti að vera með töluna á hreinu. Hann keypti nefnilega WOW air í byrjun nóvember og fékk þá aðgang að bókhaldi keppinautarins.
Kaupsamningnum var hins vegar rift í lok nóvember og miðað við nýlegar fréttir af vanskilum WOW, m.a. hjá lífeyrissjóðum starfsmanna, má telja ólíklegt að flugfélagið hafi grynnkað á skuldinni hjá Isavia síðustu mánuði. Á þeim tíma hafa notendagjöld WOW air á Keflavíkurflugvelli numið að lágmarki 800 til 900 milljónum króna og sú upphæð gæti hafa bæst við skuldina.
Þetta var ekki í fyrsta skipti sem Bogi gagnrýnir skuldasöfnun WOW á Keflavíkurflugvelli. Það gerði hann líka í kjölfar fréttar Morgunblaðsins haust þar sem fram blaðið fullyrti að WOW skuldaði Isavia hátt í tvo milljarða. „Ef rétt er að Isavia, fyrirtæki í opinberri eigu, sé að taka þátt í því að fjármagna framangreindan taprekstur og þar með skekkja samkeppnisstöðu á þessum markaði þá er það illskiljanlegt,“ sagði Bogi í viðtali við Mbl um miðjan september. Nokkrum klukkutímum eftir þessa yfirlýsingu Boga þá svaraði Skúli honum og Morgunblaðinu fullum hálsi og sagði WOW aldrei hafa skuldað Isavia yfir tvo milljarða í lendingagjöld. Það hefur hins vegar ekkert heyrst frá eiganda WOW nú um helgina eftir að forstjóri Icelandair benti á skuldasöfnun keppinautar út á Keflavíkurflugvelli.
Það hefur reyndar vakið athygli að Bogi tjáði sig aldrei opinberlega um þessa skuld eftir að kaupum Icelandair á keppinautnum var rift. Þá þögn mátti skilja sem svo að WOW stæði í skilum við Isavia eða að skuldahalinn væri ekki langur líkt og Túristi fjallaði um í nóvember. Hörð gagnrýni forstjóra Icelandair á Isavia á föstudag staðfestir hins vegar veruleg vanskil og mun forsvarsfólk Isavia væntanlega þurfa að svara fyrir þau strax eftir helgi enda er Icelandair stærsti viðskiptavinur fyrirtækisins.
Það er reyndar ekki óþekkt að ríkið hlaupi undir bagga með flugfélögum og Icelandair hefur notið fyrirgreiðslu í gegnum árin. Þá var samkeppni í flugi til og frá landinu þó varla til staðar og eins voru ríkisstyrkirnir opinberir. Bjarni Benediktsson, fjármálaráðherra, sem fer með hlut ríkisins í Isavia, gæti því þurft að tjá sig um þessa ríkisaðstoð sem WOW air virðist nú njóta og forstjóri Icelandair setur nú út á.